😊 प्रेरणादायी व्यक्तिमत्त्व : शाहीर पठ्ठे बापूराव .😊

💐 तमाशा या लोककलेचा प्रणेता,वगनाट्य व लावणीसम्राट : शाहीर पठ्ठे बापूराव .( श्रीधर कृष्णाजी कुलकर्णी).💐

          

                सांगली जिल्ह्यातील वाळवे तालुक्यात हरणाक्ष रेठरे या गावी त्याचा जन्म झाला.औंधच्या महाराजांच्या आश्रयाखाली इंग्रजी पाचव्या इयत्तेपर्यंत त्याचे शिक्षण झाले.लहानपणापासून त्याला कवने करण्याचा छंद होता.गावातील तमाशाच्या फडासाठी त्याने लावण्या रचल्या आणि त्या गावोगावी पोहचल्या. मग त्याने स्वतःचा फड उभा केला.स्वरचित लावण्या लिहणे त्या गाणे,गण गौळण,भेदीक, रंगबाजीच्या,झगड्याच्या अशा अनके एकाहून एक सरस लावण्या त्याने लिहल्या.त्यांच्या रचना लाखाच्या घरात आहे असे म्हणतात.इतके अद्भुत साहित्य लेखन करणारा तो मुलगा म्हणजे  श्रीधर कृष्णाजी कुलकर्णी ऊर्फ पठ्ठे बापूराव.   

            बापूराव यांनी लिहलेले मिठाराणीचा वग हे वगनाट्य महाराष्ट्रात तुफान लोकप्रिय झाले.ते असताना त्यांची लावणीची 'पठ्ठे बापूराव यांच्या लावण्या व गवळणी भाग पहिला','पठ्ठे बापूराव यांच्या ढोलकीवरील दिलखुलास लावण्या' अशी दोन पुस्तके प्रसिध्द झाली.पुढे त्यांच्या लावण्यांचे भाग 1,2,3, प्रकाशित झाले.याला न चि केळकर यांचे प्रास्ताविक लाभले आहे.                

              बापूराव यांच्या लेखनात बेपर्वाई असली तरी जसा प्रसंग असेल तसा ठसकेबाज समर्पक शब्द वापरणे हे त्यांच्या लेखणीचे वैशिष्ट्य.त्यामुळेच न.चि. केळकर यांनी त्यांना दिलेला शीघ्रकवी हा किताब सार्थ ठरतो.चौदा रत्नांचा जन्म,'ता' अक्षरांची भेदक लावणी. यावरून त्यांचे लावणीवरील प्रभुत्व अधोरेखित होते.त्यांची मुंबई ची लावणी त्याच पठडीतील .वग,गौळणी,पदे,कटाव,सवाल जवाब यांनी एक काळ बापूराव यांनी गाजवला.त्यांनी लावणीला एक उंची  प्राप्त करून दिली.बापूराव यांनी त्यांचा आनंद त्यांना जे आवडत होते त्यात शोधला. यातून आपल्यालाही  हेच शिकायला मिळते की तुम्हाला जे आवडत असेल ते काम मनसोक्त करा.आपल्या आनंदाच्या जागा स्वतःच शोधा, स्वतःच्या मनाशी दिवसातून एकदा तरी बोला.

💐💐💐💐💐💐💐💐💐💐💐💐💐💐💐

                                          😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : लिओनार्दो व्हीन्सी.😊

💐 मानवी भावना चितारणारा पहिला चित्रकार, जगप्रसिद्ध चित्र मोनालीसाचा निर्माता : लिओनार्दो व्हीन्सी.💐

     

     🎂💐 जन्म - १५ एप्रिल १४५२ 💐🎂

                लिओनार्दो हा १५ व्या शतकात रेनेसान्स काळात झालेला एक महान चित्रकार व संशोधक होता. कलेच्या इतिहासात त्याने संशोधक वृत्तीने दिलेल्या अमूल्य योगदानामुळे त्याचे नाव नेहमीच अग्रस्थानी राहिले आहे. 

               लिओनार्दोने अनेक क्षेत्रांत योगदान दिले असले, तरी इतिहासात त्याचे नाव चित्रकार म्हणून ठळकपणे दिसते. मोनालिसा, द लास्ट सपर, मॅडोना ऑफ द रॉक्स ही त्याची काही जगप्रसिद्ध चित्रे आहेत. चित्रांवरून त्याचे तत्कालीन चर्च या धर्मसंस्थेसोबत असलेले मतभेद, उलट अक्षरे काढून लिहिण्याची सवय, नव्याने सापडलेल्या त्याच्या नोंदवह्यांतील आश्चर्यकारक माहिती व कित्येक विचारवंतांनी त्याचा अभ्यास करून मांडलेली मते, यांवरून लिओनार्डो विसाव्या शतकापासून काहीसा गूढतेच्या वातावरणात आला आहे. त्यातच त्याच्या विविध चित्रांचा अभ्यास वेगवेगळ्या दृष्टिकोनांतून सुरू झाला. 

                तत्कालीन सामाजिक, राजकीय व धार्मिक परिस्थितीचा अभ्यास केलेले विचारवंत त्याच्या चित्रांवरून वेगवेगळ्या संदेशांच्या कल्पना करतात. डॅन ब्राउन या लेखकाने नुकतीच 'दा व्हिंची कोड' या काल्पनिक कादंबरीत लिओनार्दोची वेगळीच गूढ भूमिका मांडली.

              लिओनार्दोचा जन्म इटली देशातील फ्लॉरेन्स प्रांतात झाला. लिओनार्दो त्याच्या आईवडिलांचे अनौरस अपत्य होता. जन्मानंतर त्याचा सांभाळ ५ वर्षे आईनेच केला. त्यानंतर मात्र त्याच्या वडिलांनी त्याचा सांभाळ करायची तयारी दर्शविली व याचवेळी त्याच्या आईचेही लग्न ठरले. अशात लिओनार्दो त्याच्या वडिलांकडे फ्लॉरेन्सला आला. 

             त्याचे वडिल सधन होते. लिओनार्दोच्या शिक्षणाकडे, देखभालीकडे त्यांनी योग्य लक्ष पुरवले. अभ्यासू आणि चौकस असणाऱ्या त्याला चित्रकलेत विशेष गती होती.त्याचबरोबर गणित,विज्ञान, काव्य संगीत याही विषयांची त्याला आवड होती.वडिलांनी त्याची कलेतील आवड बघून त्याला आंद्रे डेल वेराचीओ कडे शिकण्यासाठी ठेवले.येथे शिकताना तो अवघ्या विसाव्या वर्षी  गिल्ड ऑफ आर्टिस्ट चा मास्टर होतो.तो मुलगा इतका कसलेला चित्रकार होतो की त्या काळात जो तैलरंगाचा वापर तो सहजतेने चित्रात करू लागतो.पुढे तो जगात अजरामर झालेल्या गूढ स्मितहास्य असणाऱ्या मोनालीसा या स्त्री चे पोर्टेट रंगवतो.तो महान चित्रकार म्हणजे म्हणजे लिओनार्डो दा व्हीन्सी . 

             मोनालीसा या चित्राचे वैशिष्ट्ये म्हणजे या स्त्रीचे स्मितहास्य कुठूनही पाहिले तरी तिचे डोळे आपल्याकडेच पाहतात असे वाटते. भले भले समीक्षक अजूनही या चित्राचा नेमका गूढ  अर्थ काय हे पाच शतके उलटली तरी शोधत आहे.याचबरोबर मिलान मधील मारिया चर्च मध्ये  येशू ख्रिस्त आपल्या बारा शिष्याबरोबर भोजन घेत आहे हे लिओनार्डो यांनी प्लास्टर वर तैलरंगात काढलेले चित्रही प्रचंड वाहवा मिळवून गेले.                     

         ग्लायडर,आकाशात उडणारे वाहन,हवेचे घटक,शरीराचे अवयव,वनस्पतींची वाढ,अशा अनेक विषयांचे लिओनार्डो यांना आकर्षण होते. या सर्वांची विशेष अशी माहिती त्यांनी संकलित केलेली होती.प्रबोधन काळातील उत्कृष्ट विचारवंत म्हणून आजही त्यांचे नाव सन्मानाने घेतले जाते.संगीत आणि चित्रकलेवर लिओनार्डो यांनी हुकूमत गाजवली ती आपल्या प्रचंड मेहनतीने आत्मसात केलेल्या चित्रकला या कलेमुळे.त्यांचे जीवन मोनालीसा चित्रावरून जणू एकच संदेश देते की एकच काम असे काही मन लावून सर्वस्व झोकून देऊन करा की त्या कामातून इतिहास निर्माण झाला पाहिजे.आणि लोक सहज म्हटले पाहिजे असा माणूस पुन्हा होणे नाही.

💐💐💐💐💐💐💐💐💐💐💐💐💐💐💐

                                        😊 संकलन 😊

                                       श्री. भरत पाटील.

😊 प्रेरणादायी व्यक्तिमत्त्व : युरी गागारीन 😊

💐 जगातील पहिला अंतराळयात्री : युरी गागारीन 💐

     

                 रशिया देशातील मास्को शहराजवळील क्लुशिनो या छोट्याशा गावी त्याचा जन्म 9 मार्च 1934 साली झाला.वडील सुतारकाम करत असे.घरात कुणीही उच्चशिक्षित नाही.पण त्याच्या आईला वाचनाची खुप आवड होती.ती गोडी त्यालाही लागली.दुसऱ्या महायुद्धात इतर कुटूंबाप्रमाणे त्याच्या कुटूंबाचेही  प्रचंड हाल झाले.त्यानंतर स्थैर्य आल्यावर सर्व भावंडांचे शिक्षण सुरू झाले. एका सामान्य कुटूंबात घरात त्याचा जन्म झाला होता तरी तो मुळातच तल्लख बुद्धिमत्तेचा होता.ते ओळखूनच त्याचे शिक्षक त्याला शिक्षणात मदत करत असे.त्याचे गणिताचे शिक्षक दुसऱ्या महायुद्धात रेड आर्मी एअरफोर्स मध्ये प्रवेश घेतात.तेव्हापासून त्याचे एअरफोर्स मध्ये आकर्षण  वाढते.पुढे तो एअरो क्लबचा सदस्य होतो. पायलट पदाची परीक्षा पास होतो,पोस्ट ग्रॅज्युएशन  करतो.पुढे तो मुलगा जगातील पहिला अंतराळवीर मान्यता पावतो.तो मुलगा म्हणजे पृथ्वीला अंतरिक्षयानातून अंतराळ फेरी घालणारा पहिला अंतराळवीर युरी गागारीन.                   

              1960मध्ये 20 अंतराळवीरांपैकी युरी गागारीन यांची एकट्याची सोव्हिएत अंतराळ कार्यक्रमांतर्गत निवड झाली होती.त्यानंतर त्याच्या अवकाशातील ट्रेनिंगला सुरवात झाली.   ट्रेनिंग पूर्ण झाल्यावर युरी यांनी 12 एप्रिल 1961 रोजी अंतराळयानातून अंतराळात प्रवेश करून पृथ्वीला प्रदक्षिणा घातली,आणि युरी यांचे नाव इतिहासात अजरामर झाले.              

              अंतराळ यान तेथील वातावरण हाताळण्याची क्षमता या अद्वितीय  गुणांमुळे युरी यांना या आगळ्यावेगळ्या आणि पूर्णतः नवीन असणाऱ्या  क्षेत्रात यश मिळाले.त्यांच्या या कामगिरीबद्दल त्यांचा रशियाने सोव्हिएतवीर म्हणू  गौरव केला.अंतराळ कार्यक्रमात काही चाचण्यात व्यस्त असताना वयाच्या अवघ्या  34 व्या वर्षी त्यांचा मृत्यू झाला.उणेपुरे 34 वर्षे आयुष्य लाभलेल्या युरी गरीब घरात जन्माला येऊनही अंगी  असणाऱ्या साहस,चिकाटी,कर्तव्यक्षमता या साऱ्या गुणांमुळे इतरांपेक्षा वेगळे ठरले आणि अल्पाआयुष्यातही आपला अजरामर ठसा सोडून गेले.

💐💐💐💐💐💐💐💐💐💐💐💐💐💐💐

                                        😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : बिस्मिल्ला खॉं.😊

💐 जगप्रसिद्ध सनईवादक, पदमविभूषण, भारतरत्न: पंडीत बिस्मिल्ला खों 💐

      

                बिहार   राज्यातील शहाबाद जिल्ह्यातील दुमराव येथे त्याचा जन्म 21मार्च 1916 मध्ये झाला.सनई वाजवणे हा त्याचा घराण्याचा मूळ व्यवसाय. त्यामुळे लहानपणीच।त्याच्या कानावर सनई चे सूर पडत असे.हे सुरांचे संस्कार त्याने उत्तमरित्या आत्मसात केले होते.त्याचे मामा अलिबक्ष यांच्याकडे त्याने सनई वाजवण्याचे शास्रशुध्द शिक्षण घेतले.लहान वयातच अलाहाबादच्या संगीत परिषदेत त्याच्या सनई वादनाचा कार्यक्रम होतो.त्यानंतर तो मागे वळून पहात नाही. तो सनईच्या सुरांचा जणू महानायक बनतो. साऱ्या जगाला सनईच्या स्वप्नवत सुरांची ओळख करून देतो.सनई नाव आले की त्याचे नाव जोडले जाणारच इतके अफाट यश तो मिळवतो.ही संगीताची साधना करणारा तो मुलगा म्हणजे जगप्रसिद्ध सनई वादक बिस्मिल्ला खाँ.          

                बिस्मिल्ला खाँ यांनी कोलकत्ता, लखनौ यासारख्या मोठ्या शहरात  सनई वादनाचे कार्यक्रम करून लोकांची वाहवाह मिळवली.त्यानंतर ते अनेक सुवर्णपदकाचे मानकरी ठरले.त्यांच्या सनई वादनातील अतुलनीय योगदानाबद्दल त्यांना भारतरत्न,पदमविभूषण,रॉयल नेपाळ आर्ट अँकॅडमी,संगीत अकादमी यासारखे असंख्य मनाचे पुरस्कार मिळाले.एक फुंकर मारून वाजवायचे वाद्य पण  आपल्या अद्भुत तंत्राने आणि शैलीने त्यात बिस्मिल्ला खाँ यांनी जादू निर्माण केली.  

               ख्याल,ठुमरी,कजरी,पूरवी,यासारख्या लोकसंगीतावर आधारित धून ते जितक्या कौशल्याने वाजवीत त्याहून सुरेल असे रगदारीचे सूर त्यांच्या सनईतून बाहेर पडत असे.भारत्याच्या पहिल्या स्वातंत्र्य दिनाला लाल किल्ल्यावर सनई वादन करणारे बिस्मिल्ला खाँ 50 वर्ष स्वातंत्र्याला झाल्यावर त्याच लाल किल्यावर सनई वाजवायला होते.हा कलेचा अतिउच्च झालेला सन्मान म्हणावा लागेल.बिस्मिल्ला खाँ यांचे जीवन हेच शिकवते की गोष्ट कुठलीही असुद्या त्याची एकदा साधना केली,त्यासाठी अफाट परिश्रम घेतले की तुम्ही जे काम करता ते संस्मरणीय ठरते.सुवर्णाक्षरांनी कोरून ठेवण्यासाठी.

💐💐💐💐💐💐💐💐💐💐💐💐💐💐💐

                                         😊 संकलन 😊

                                      श्री. भरत पाटील.

😊 प्रेरणादायी व्यक्तिमत्त्व : उस्ताद झाकीर हुसेन.😊

💐भारतीय शास्त्रीय संगीताचा आंतरराष्ट्रीय स्तरावर ओळख निर्माण करून देणारा,तबल्याच्या जादूगार,पद्मश्री,पदमविभूषण : उस्ताद झाकीर हुसेन.💐

       

             त्याचा जन्म मुंबई येथे 9 मार्च 1951 साली झाला.त्याचे वडील उस्ताद अल्लारख्खा प्रसिद्ध तबलावादक.त्यांच्याच कल्पनेतून आणि रियाजातून तयार झालेल्या पारंपरिक तबलावादनातून तबलासंगत व एकलवादन या दोन्हीमध्ये त्याने स्वतःची अशी एक शैली निर्माण केली.आपल्या स्वतःच्या विदवत्तेने त्यात आणखी भर खातली.त्याने तरुणपणी अनेक मोठमोठया गायक कलाकारांना साथ संगत दिली.भारतीय  संगीतातील ठेका,लय,तालाचे विश्व,म्हटले की त्याचे नाव प्रथम समोर येते.भारतीय संगीताचे वेगळेपण देश विदेशात पोहचवणारा तो मुलगा म्हणजे तबल्याचा जादूगार उस्ताद झाकीर हुसेन.

                     झाकीर हुसेन यांच्या कलेचा सन्मान म्हणून त्यांना पदमश्री,पदमभूषण, ग्रॅमी ,भारत-अमेरिका,संगीत- नाटक अँकॅडमी यासारखे मानाचे पुरस्कार प्रदान करण्यात आला.तबला आणि डग्यावर वाजू शकणारे सर्व नाद त्यांच्या हातून स्पष्ट आणि नेमकेपणाने वाजत.मग तो नाजूक किनकिनाट असो किंवा नगाऱ्यासारखा दणदणाट असो.त्यातून निघणाऱ्या बोलातला ठेका आणि ताल हा वाखाण्याजोगाच.तबला या वाद्यावर त्यांची बोटे अक्षरशः हुकमुत गाजवत असे.     

               झाकीर हुसेन कोणत्याही गायक किंवा वादकाला साथ देताना गायकाच्या गाण्याशी आणि वादकाच्या तलाशी त्यांच्या ढंगा प्रमाणे एकरूपता साधून गायनाला किंवा वादनाला वेगळे सौंदर्य प्राप्त करून उच्च पातळीवर नेऊन ठेवत असे.पाश्चिमात्य संगीत वादानालाही त्यांनी साथ संगत केली आहे.हिंदुस्थानी ताल वाद्य व पाश्चिमात्य ताल वाद्य यांचा मेळ घालण्याचे काम झाकीर हुसेन यांनी केले.प्रचंड मेहनत घेऊन त्यांनी तबला वाद्यावर  हुकूमत गाजवली.यामागे त्यांची अथक साधना होती.प्रचंड मेहनत होती.यावरून हाच संदेश मिळतो यशासाठी दिवस रात्र मेहनत घ्यावी लागते.तसे केले तरच तुम्हाला यशाचा झेंडा अभिमानाने खांद्यावर घेऊन मिरवता येतो.

💐💐💐💐💐💐💐💐💐💐💐💐💐💐💐

                                          😊 संकलन 😊

                                          श्री.भरत पाटील.

😊 प्रेरणादायी व्यक्तिमत्त्व : स्वामी विवेकानंद 😊

💐 भारताला  अध्यात्मिक विश्वगुरु बनविण्यासाठी धडपडणारा ,हिंदू धर्माच्या तत्वज्ञानाची जगाला ओळख करून देणारा तेजस्वी पुरुष : स्वामी विवेकानंद .💐

        

                पश्चिम बंगाल राज्यातील कोलकता येथील सिमलापल्ली येथे त्याचा जन्म 12 जानेवारी 1863 मध्ये झाला.त्याचे वडील विश्वनाथ दत्त हे उच्च न्यायालयात वकील तर आई भुवनेश्वरीदेवी यांना अध्यात्माची प्रचंड आवड.घरात प्रथम पासून शांत संयमी वातावरण याच वातावरणाचा परिणाम त्याच्यावर झाला.लहानपणी प्रचंड बुद्धिमान बालक म्हणून त्याची ख्याती होती.अभ्यासाबरोबर व्यायाम,कुस्ती,पोहणे,घोडेस्वारी, लाठीयुद्ध,गायन,वादन,साहीत्य, साऱ्या क्षेत्रात लीलया संचार करत असे.पुढे तो मुलगा बी.ए ची पदवी संपादन करून तर्कशास्त्र,युरोपचा इतिहास यांचा अभ्यास करतो.आणि भारताचे पाश्चिमात्य जगात भारताचे अध्यात्मिक व सांस्कृतिक प्रतिनिधित्व करतो.तो ओजस्वी आणि तेजस्वी मुलगा म्हणजे नरेंद्रनाथ दत्त उर्फ स्वामी विवेकानंद. 

               त्यांचा जन्मदिवस युवा दिन म्हणून साजरा केला जातो.विवेकानंद यांनी भारतात आणि विदेशात भाषणे देताना वेदांत,योग्य व भारतीय संस्कृतीची जगाला ओळख करून दिलीच त्याशिवाय हिंदू धर्माचा मानवतावादीचेहरा जगासमोर आणून जगाला शांततेचा संदेश दिला.त्यांनी 1993 साली अमेरिकेतील शिकागो येथे झालेल्या धर्म परिषदेच्या भाषणाची सुरुवात'माझ्या प्रिय  बंधू भगिनींनो'अशी करताच सलग दोन मिनिटे झालेल्या टाळ्यांचा कडकडाट जग अजूनही विसरले नाही.रामकृष्ण परमहंस विवेकानंद यांना गुरू म्हणून लाभले आणि संन्याशाची दीक्षा घेत ते विवेकानंद झाले. त्यांनी त्यांचे अवघे जीवन बदलून टाकले.विवेकानंद यांनी रामकृष्ण मठ व रामकृष्ण आश्रम या माध्यमातून देश विदेशात त्यांचे विचार  पोहचवले.                                                   तत्वज्ञान,धर्म,इतिहास,सामाजिक,विज्ञान,कला,साहित्य,वेद,उपनिषदे,विविध धर्मग्रंथ यांचा प्रचंड अभ्यास केल्यावर त्यांनी सर्व धर्म एक आहे,त्या सर्वांचे उद्दिष्ट मानव कल्याण हेच आहे हे सूत्र जगाला दिले.अमेरिकेतील वृत्तपत्रांनी त्यांना भारतातून आलेला एक वादळी व्यक्तिमत्त्वाचा संन्याशी,दैवी वक्तृत्वाचा धनी ही विशेषणे दिली.कन्याकुमारी येथे समुद्रात काही अंतरावर विवेकानंद यांचे स्मारक आहे.कोलकत्यातील बेलूर मठात 4 जुलै 1902 मध्ये समाधी घेताना मी चाळीस वर्षापर्यंत जगणार नाही हे शब्द त्यांनी खरे करून दाखवले.थोडेच मिळालेले त्यांचे आयुष्य आपल्याला हीच शिकवण देते संघर्ष करणे जितके कठिण असेल तितके तुमचे यश शानदार असेल.असे कधीच म्हणू नका की मी करू शकत नाही तुम्ही अनंत आहात तुम्ही कोणतीही गोष्ट करू शकता.उठा जागे व्हा ध्येय पूर्ण होईपर्यंत थांबू नका.

💐💐💐💐💐💐💐💐💐💐💐💐💐💐💐

                                        😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : के सीवन 😊

💐 भारताचे महान वैज्ञानिक, इस्रोचे प्रमुख ,रॉकेट मॅन : के सीवन 💐

   

                  तामिळनाडू राज्यातील कन्याकुमारी जिल्ह्यातील मेलासरक्कलविलै गावात 14 एप्रिल 1957 मध्ये झाला. वडील कैलासवदीवू व आई चेल्लम हे शेतकरी.तो लहानपणापासून कुशाग्र बुद्धिमत्तेचा असतो.त्याचे प्राथमिक शिक्षण सरकारी शाळेत तामिळ या मातृभाषेत शिक्षण होते .तो मुलगा मद्रास येथील MIT मध्ये एअरोस्पेस मध्ये अभियांत्रिकी पदवी मिळवतो.पुढे भारतीय तंत्रज्ञान संस्था मुंबई येथून पी.एच.डी पदवी मिळवतो.तो मुलगा पालिकेच्या शाळेत शिकूनही इस्रो सारख्या प्रतिष्ठित संस्थेचा प्रमुख बनतो.तो मुलगा म्हणजे भारताचे महान शास्त्रज्ञ के.सीवन ऊर्फ रॉकेट मॅन.               

                 सीवन यांचे अवकाश कार्यक्रमातील क्रयोजनिक इंजिन बनवणे,मिशन डिझाईन उपप्रणाली पातळीचे प्रमाणिकरण ज्याचा वापर प्रक्षेपण वाहनात केला जातो,डे ऑफ लॉंच पवन बायसिक ज्याचा वापर कोणत्याही वातावरणात रॉकेट प्रक्षेपण करण्यासाठी होतो,ध्रुवीय उपग्रह प्रक्षेपक या सर्व प्रणाली,इस्रो ने एकाच वेळी 104 उपग्रह सोडण्याची मोहीम यामध्ये त्यांचे योगदान अमूल्य आहे.त्यांच्या याच कार्याची दखल घेत त्यांना सत्यभामा विद्यापीठाची डॉक्टर ऑफ सायन्स,भारतीय अंतरिक्ष संगठन गुणवत्ता पुरस्कार,डॉ.विक्रम साराभाई संशोधन पुरस्कार,यासारखे अनके सन्मान मिळाले.             

              भारताच्या चांद्रयान मोहिमेचे यशस्वी प्रक्षेपण त्यांनी केले.अशी कामगीरी करणारा भारत हा जगातील चौथा देश ठरला.विक्रम लँडर चा संपर्क तुटल्याची घोषणा त्यांनीच यावेळी केली.भारताचा सर्वात शक्तिशाली उपग्रह जीएसएलव्ही निर्मितीत त्यांचा वाटा मोलाचा होता. फाडफाड इंग्रजीच्या जमान्यात मातृभाषेचे बोट धरत सीवन इतके मोठे झाले.शेतकऱ्याच्या घरात जन्म होऊनही त्यांनी परिस्थिती समोर हार मानली नाही.ते लढत राहिले आणि प्रखर बुद्धिमत्तेच्या जोरावर यशस्वी ही झाले.

💐💐💐💐💐💐💐💐💐💐💐💐💐💐💐

                                          😊 संकलन 😊

                                         श्री. भरत पाटील.

प्रेरणादायी व्यक्तिमत्त्व : दादाजी रामजी खोब्रागडे 😊

💐 इयत्ता 3 री शिकलेला,तांदळाच्या सुधारित 9 जाती शोधून काढणारा शेतकरी संशोधक : दादाजी रामजी खोब्रागडे.💐

         

              चंद्रपूर जिल्ह्यातील नागभीड तालुक्यातील नांदेड येथे त्याचा जन्म झाला.त्याच्या घरची परिस्थिती अत्यंत हलाकीची होती.घरी जणू अठरा विश्व दारिद्र्य.घरी असणारी दीड एकर शेती कसून तो आपल्या कुटूंबाचा उदरनिर्वाह करत होता. शिक्षण फक्त तिसरी पर्यंत झालेले.एक दिवस भाताच्या शेतात काम करताना पटेल-३या जातीच्या वाणाची एक बारीक दाणे असणारी वेगळी लोंब त्याला दिसली.ही लोंब पाहून यापासून वेगळे भाताचे बियाणे तयार करता येईल असा विचार त्याच्या मनात आला.सुमारे सात वर्षे यावर मेहनत घेऊन त्याने भाताची विक्रमी उत्पादन देणारी एच.एम.टी सोना ही जात शोधली. पुढे तो मुलगा 9 भाताच्या जाती शोधून काढतो.कमी शिक्षण असूनही संशोधकांनाही विचार करायला लागेल असे काम करून दाखवतो. शेतकऱ्याला वरदान ठरणाऱ्या या भाताच्या नवीन जाती शोधणारा तो मुलगा म्हणजे दादाजी रामजी खोब्रागडे.  

                          दादाजी यांनी कृषी क्षेत्रात केलेल्या या अद्भुत संशोधनाची दखल घेऊन त्यांना पहिला रिचारिया पुरस्कार जो तांदळाच्या संशोधनासाठी दिला जातो तो प्रदान करण्यात आला.याशिवाय वसंतराव नाईक कृषी भूषण पुरस्कार, पंजाबराव देशमुख कृषिरत्न पुरस्कार,फोर्ब्ज यादीतील प्रभावशाली व्यक्ती,राष्ट्रपतींच्या हस्ते विशेष सत्कार यासारखे अनेक सन्मान प्राप्त झाले.                             

               एच.एम.टी सोना,नांदेड हिरा,नांदेड चेंनूर, विजय नांदेड, नांदेड 92,डी.आर.के,नांदेड दीपक,काटे एच.एम.टी, डी.आर के- 2 असे नऊ वाण त्यांनी शोधले तेही स्वतः कोणतेही  संशोधक नसताना हे विशेष.जिज्ञासा आणि संशोधनासाठी शिक्षण आडवे येत नाही हेच दादाजी यांनी दाखवून दिले.आज भारतातच नाही तर जगभरात एच.एम.टी सोना हे वाण वापरले जाते.आजही कितीतरी लोक केवळ भात खाऊन झोपतात.दादाजी यांनी प्रसंगी स्वतः उपाशी राहून गरिबांच्या भूकमुक्तीचा मार्ग आपल्या संशोधनातून दाखवला.आयुष्याच्या शेवटी त्यांच्या वाट्याला पक्षघाताने आलेले प्रचंड एकाकी पण आले यातच त्यांची जीवनयात्रा संपली.पण जाताना ते लाखो शेतकऱ्याच्या जीवनात आनंद देऊन गेले.त्यांचे जीवन हेच सांगते की तुमचे शिक्षण तुमच्या कल्पक बुद्धिमत्तेच्या आड कधीच येत नाही.हीच कल्पकता तुमचे नाव इतिहासाला राखून ठेवायला भाग पाडते.

💐💐💐💐💐💐💐💐💐💐💐💐💐💐💐

                                         😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : पोपटराव पवार 😊

💐 खेड्याकडे चला हा गांधीजींचा मंत्र मनापासून जपून हिवरेबाजार गावाला जागतिक ओळख देणारा आदर्श सरपंच ,पद्मश्री : पोपटराव पवार.💐

      

                  अहमदनगर जिल्ह्यातील नगर तालुक्यातील हिवरे बाजार येथे त्याचा जन्म 1960 मध्ये झाला.जिल्ह्याच्या ठिकाणापासून 15 किमी गाव पण कुठलीही विशेष अशी सुधारणा गावात नाही.1972 च्या दुष्काळानंतर परिस्थिती तर आणखी वाईट झालेली होती.अडीचशे ते चारशे मिली पावसाचे प्रमाण त्यामुळे गावात पाण्याची भीषण टंचाई.शेतीला पाणी नाही त्यामुळे गावातून शहराकडे  स्थलांतर करणारे लोक खुप होते. जे तरुण शिकले ते शहरात स्थायिक झाले.गावातील भयाण परिस्थितीची ना कुणाला खंत ना बदलण्याची उर्मी.अशा वेळी एक तरुण गावात पहिला पदव्युत्तर पदवी घेऊन एम.कॉम होतो.1989 च्या काळात सहज नोकरी मिळत असतानाही गाव न सोडण्याचा निर्धार करतो. गावतील परिस्थिती बदलण्यासाठी प्रचंड संघर्ष करतो.साऱ्या गावाला सारे तंटे विसरायला लावून एका छताखाली आणतो.पुढे त्या गावचे नाव देशात नाही जगात आदर्श ग्राम म्हणून घेतले जाते ते गाव म्हणजे आदर्श गाव हिवरे बाजार आणि हे शाश्वत काम करणारा तो मुलगा म्हणजे आदर्श सरपंच पदमश्री पोपटराव पवार.                            

                   ग्रामविकास, जलसंधारण, मृदासंधारण,जलव्यवस्थापन, वृक्षलागवड,दुग्धक्रांती,गोबर गॅस,गांडूळखत, या साऱ्या क्षेत्रात पोपटराव यांनी ग्रामस्थांच्या बरोबर केलेल्या स्वप्नवत कामाचा सन्मान म्हणून गावाला आदर्श गाव,यशवंत ग्राम,निर्मल ग्राम,वन ग्राम, राष्ट्रीय जल ग्राम,स्वच्छता अभियान, तंटामुक्त ग्राम,यासारखे असंख्य पुरस्कार मिळाले आहेत.तर पोपटराव यांचा पदमश्री,राष्ट्रीय विश्वरत्न, कृषिरत्न, वनश्री संत तुकाराम यासारख्या अनेक पुरस्कारांनी गौरव केला गेला आहे.पडीक जमिनीवर झाडे लावणे, समतल चर खोदून पाणी अडवणे,गावातील जमिनी गावाबाहेरील व्यक्तींना न विकणे, ऊस, केळी ही जास्त पाण्याची पिके गावात न घेणे,गावात बोअरिंग न घेणे, धोबीघाटावर कपडे धुणे,शौचालय वापरणे, लग्नापूर्वी HIV चाचणी करणे,यासारखे अनके निर्णय ग्रामसभेने घेतले ते मंजूर झाले,ते सर्वांनी पाळले म्हणून आज हिवरे बाजार यशस्वी गाव आहे.          

            1989 साली तरुण सरपंच ते आजचे पोपटराव खूप काळ लोटला आहे पण काम करण्याची तीच उर्मी आजही विविध ठिकाणी व्याख्याने देताना जाणवते.पदमश्री हा सन्मान एका गावच्या सरपंच असणाऱ्या माणसाने मिळवणे ही साधी गोष्ट नाही,गावासाठी पोपटराव कित्येक वर्षे झिजले म्हणून हे शक्य झाले.ग्रामसभेला लोक येत नाही म्हणून प्रत्येक घरात ग्रासभेच्या विषयाचा कागद वाटप करून गावकऱ्यांचा  गावच्या विकासात लोकसहभाग वाढवणारे पोपटराव,एकाच वेळी साऱ्या गावाची जमीन मोजणी करणारे पोपटराव हे दुर्मिळ सरपंच आहेत.पोपटराव पवार यांनी आपण मोठे होताना आपले गाव आपल्यापेक्षा मोठे झाले पाहिजे,नावारूपाला आले पाहिजे हा विचार नेहमी केंद्रस्थानी ठेवला.सर्वाना बरोबर घेऊन पुढे जात राहिले आणि हिवरे बाजार जगाच्या नकाशावर ठळक अक्षरात कोरले गेले.पोपटरावांचे आयुष्य हेच सांगते की कुठून तरी सुरुवात केली की रस्ता तयार होत जातो.एकदा का रस्ता तयार झाला की मार्ग आपोआप सोपा होतो.

💐💐💐💐💐💐💐💐💐💐💐💐💐💐💐

                                        😊 संकलन 😊

                                       श्री. भरत पाटील.

😊 प्रेरणादायी व्यक्तिमत्त्व : राहीबाई पोपेरे 😊

💐देशी बियाणांची बचत बँक स्थापन करून दुर्मिळ वनस्पती व पिकांची रक्षक,बीजमाता, पद्मश्री : श्रीम. राहीबाई पोपेरे.💐

       

                 अहमदनगर जिल्ह्यातील अद्भूत निसर्ग सौंदर्य लाभलेल्या अकोले तालुक्यातील कोंभाळणे गाव हे तिचे माहेर आणि सासरही.अकोले तालुक्यातील लोक अतिशय निसर्गप्रेमी,प्रचंड कलासक्त,शेतीवर भरभरून प्रेम करणारे.हे गुण लहानपणी तिच्याही अंगी होते.लोकांना येणारे विविध आजार हे रासायनिक शेती आणि हायब्रीड वानांमुळे तर येत नसावे असा विचार तिच्या मनात येतो.आणि मग सुरू होतो विषमुक्त शेती करण्याचा सर्वाना थक्क करणारा प्रवास.याला ती इतकी वाहून घेते की देशी अस्सल 52 पिकांचे 114 वाण तिच्याकडे साठवले जातात. पुढे बायफ या संस्थेच्या माध्यमातून कळसुबाई परिसर स्थानिक बियाणे संवर्धन संस्था स्थापन करून देशी बियाणांची बचत बँक स्थापन करते.ती स्त्री म्हणजे भारताची  सीड मदर,बीजमाता पदमश्री राहीबाई पोपेरे.                           

                राहीबाई यांच्या या जगावेगळ्या कामाची दखल घेऊन भारत सरकारने त्यांचा पदमश्री हा किताब देऊन सन्मान केला आहे. त्याचबरोबर त्यांना बी.बी.सी शंभर प्रभावशाली महिला, नारीशक्ती पुरस्कार ही मिळाले आहे.जगातील कोणत्याही आंतरराष्ट्रीय  बियाणे कंपनी  कडे नाहीत असे गावठी वाण राहीबाई यांच्याकडे उपलब्ध आहेत.नुसते वालाचे 20 प्रकार त्यांच्याकडे आहेत.गावठी पालेभाज्या, वेलवर्गीय भाज्या,वांगी,भेंडी,पालक,मेथी,आंबा,यारखे अनेक गावठी वाण त्यांच्या सीड बँकेत आहेत.म्हणूनच महान शास्त्रज्ञ डॉ.रघुनाथ माशेलकर यांनी त्यांना दिलेली 'सीड मदर' ही उपाधी सार्थ ठरते.त्यांच्या शेजारील बागेत शेकडो झाडे लावून त्यांची नावेही सहज सांगणाऱ्या राहीबाई यांचे कोणतेही औपचारिक शिक्षण नाही.पण त्या शिक्षित माणसाला ही आपल्या अफाट ज्ञानाने विचार करायला भाग पाडतात.गावठी वाणाचे संरक्षण व संवर्धन करणे यासाठीच जणूं त्यांनी आपले आयुष्य वाहून घेतले आहे.या बिया त्या मडक्यात जतन करून ठेवतात.    

               गावरान वाण शोधणे, त्यांची लागवड करणे,त्यांच्या बिया काढणे,त्या संकलित करणे,त्या इतरांना पेरणीसाठी देणे,त्यांना प्रेरणा देऊन बियांचे संकलन करणे ही मोठी प्रक्रिया करण्यासाठी राहीबाई यांनी तीन हजार पेक्षा अधिक महिलांचा बचत गट तयार केला आहे.हे सगळे करताना  कुटुंब ,बायफ संस्था, कोंभाळणे ग्रामस्थ त्यांच्या पाठीशी खंबीरपणे उभे आहेत हे सांगायला त्या विसरत नाही.सुरवातीला त्यांनी गावठी वाण जमा करण्याचे  काम सुरू केले तेव्हा फक्त त्या एकटया होत्या,पण त्या थांबल्या नाहीत.त्यांचे जीवन आपल्याला हेच सांगत रहाते सगळे शिक्षण पुस्तकात मिळत नाही,काही अनुभवाच्या शाळेतच शिकावे लागते.आणि त्यासाठीही  अफाट मेहनत करावी लागते.कष्ट उपसावे लागतात.मग यश पहाण्यासाठी लोकांची रांग लागते.

💐💐💐💐💐💐💐💐💐💐💐💐💐💐💐

                                          😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : हनुमंत गायकवाड 😊

💐 भारतातील सर्वात मोठ्या एकात्मिक सेवा देणारी कंपनी BVG चे संस्थापक : श्री. हनुमंत गायकवाड. 💐

          

                  महाराष्ट्र राज्यातील सातारा येथील रहिमतपूर येथे त्याचा जन्म 21 ऑक्टोबर 1972 मध्ये झाला.वडील रहिमतपूर येथील न्यायालयात कारकून तर आई गृहिणी.तो लहानपणापासून अभ्यासात हुशार शाळेत कायम पहिला येत असे.घराची परिस्थिती जेमतेम होती.पुढे त्याचे सारे कुटुंब पुण्याला येते.तो दहावी नंतर इलेक्ट्रॉनिक विषयात पदविका प्राप्त करतो.दहा बाय दहा च्या खोलीत दिवस काढतो.आई शिवणकाम करत असताना तिला त्रास नको म्हणून मुलांचे क्लास घेतो.बस साठी एक रुपया मिळत नसे म्हणून चालत कॉलेजला जातो.बी ई ची डिग्री करताना 40 किमी रोज सायकल चालवतो.पण तो मुलगा जगण्याच्या संघर्ष सोडत नाही.पुढे तो मुलगा टेल्को कंपनीतील चांगली नोकरी सोडून भारतातील सर्वात मोठी एकात्मिक सेवा देणारी कंपनी स्थापन करतो.ती कंपनी म्हणजे भारत विकास ग्रुप इंडिया लिमिटेड कंपनी म्हणजेच BVG कंपनी.आणि ती उभी करणारा तो मुलगा म्हणजे श्री हनुमंत  गायकवाड.                                      

             टाटा कंपनीत हाऊस किपिंग च्या कामासाठी आठ मुले पुरवण्यापासून BVG कंपनी सुरू झाली आणि ती आज सत्तर हजार पेक्षा  अधिक लोकांना रोजगार देणारी कंपनी बनली आहे.राष्ट्रपती भवन,पंतप्रधान कार्यालय,निवासस्थान,सुप्रीम कोर्ट,तिरुपती, शिर्डी,अक्षरधाम,मंदिरे,यासारख्या प्रसिद्ध ठिकाणी BVG कंपनी स्वछता करण्याचे काम करते.देश विदेशातील व 20 राज्यात सुमारे 700 पेक्षा अधिक कंपन्या, संस्था यांचे स्वच्छतेचे काम BVG  मार्फत केले जाते.108 क्रमांकावर जलद आरोग्य सेवा देणारी ही एकमेव कंपनी आहे.सुमारे 1700 रुग्णवाहिका यात काम करतात. आशिया खंडात आपत्कालीन सेवा देणारी ही सर्वात मोठी कंपनी आहे.               एकट्या दिल्लीत नऊ हजार कामगार BVG तर्फे काम करतात.                                                             

            हनुमंतराव यांचा स्वतःवर प्रचंड विश्वास आहे यामुळेच कुर्ल्यावरून  फियाट कंपनी पुण्यातील रांजणगाव येथे आणायची होती तेव्हा 8000 हजार ट्रक लावून त्यांनी ती कामगिरी फत्ते केली होती.आपला मित्र उमेश माने यांना बरोबर घेऊन हनुमंतराव   यांनी सेवा कंपनी सुरू करण्याचे  केलेले धाडस 70 हजार पेक्षा अधिक रोजगार निर्मितीची एक आख्यायिका बनून राहिले आहे.हनुमंतराव  आपल्या यशाचे गमक सांगतात ते असे स्वतःची कोणाशीही तुलना करू नका,तुमच्या मध्ये काय उत्तम आहे त्याचा पुरेपूर वापर करा.प्रत्येकाने आपण कशात निपुण आहे हे जाणून घेतले की मिळणारे यश भव्यदिव्य असते.

💐💐💐💐💐💐💐💐💐💐💐💐💐💐💐

                                        😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : मलाला युसुफझाई 😊

💐 जगातील सर्वात कमी वयात नोबेल पुरस्कार मिळवणारी ,सामाजिक कार्यकर्त्या : मलाला युसुफझाई 💐

      

                पाकिस्तान देशातील स्वात जिल्ह्यात मंगोरा येथे तिचा जन्म 12 जुलै 1997 मध्ये झाला. वडील झियाउद्दीन तर आई तोर पेकाई यांच्या पोटी ती जन्मली.ती ज्या भागात जन्मली होती तेथे  मुलींनी शिक्षण घेणे हा जणू गुन्हा होता.जवळच असणारी तालिबानी राजवट तशी परवानगी देत नव्हती.पण ती मुलगी शिक्षण या मुद्यावर ठाम राहिली.याचा बदला म्हणून अतिरेकी तिला शाळेतच तीन गोळ्या घालतात. ती गंभीर जखमी होते,इंग्लंड मध्ये तिच्यावर उपचार होतात.यात ती बचावली जाते.जगभरातून या घटनेचा निषेध केला जातो.ती जीवन मरणाच्या संकटातून वाचल्यावर मुलींच्या शिक्षणासाठी जगभरात प्रसाराचे काम करणार असे घोषित करते.तिच्या या धाडसाचे जगभर कौतुक होते.पुढे ती मुलगी नोबेल पारितोषिक मिळवणारी जगातील सर्वात लहानमुलगी ठरते.ती प्रचंड धाडशी मुलगी म्हणजे मलाला युसुफझाई.                

              सर्वात लहान वयात शांततेचे नोबेल पारितोषिक मिळवणाऱ्या मलाला यांना इतक्या लहान वयात इंटरनॅशनल चाईल्ड पीस अवार्ड, नॅशनल युथ पीस प्राईझ ऑफ पाकिस्तान,गॅलेंट अवार्ड, मदर टेरेस मेमोरियल अवार्ड, रोम प्राईझ,वूमन ऑफ द इयर,संयुक्त राष्ट्र संघाची कन्या यासारखे चाळीसहून अधिक सन्मान मिळाले आहेत.इतके सारे पुरस्कार मिळवणाऱ्या जगातील सर्वात कमी वयाच्या आहेत.त्या संयुक्त राष्ट्र संघाच्या सर्वात तरुण शांतिदुत आहेत.       

             दहशतवादी संघटनांना तीव्र विरोध करणाऱ्या मलाला यांनी पाकिस्तानातील भीषण चित्रण जगासमोर यावे म्हणून वर्तमानपत्रात गुलमकई  नावाने डायरी लिहिली.येथील महिलांच्या मानवी हक्कांची पायमल्ली तिने जगासमोर आणली.मी भीतीपेक्षा अधिक शक्तिशाली आहे असे म्हणणाऱ्या मलाला जेव्हा तुमचा आवाज गप्प केला जातो तेव्हाच आपल्या आवाजाची किंमत आपल्याला समजते हेही आवर्जून सांगतात. एक पुस्तक, एक लेखणी,एक बालक,आणि एक शिक्षक अवघे जग बदलू शकतो हे मलाला यांचे विचार वाचले की आपल्या अफाट निश्चयाच्या आड कुणीही आले तरी प्रचंड धैर्याने त्याचा सामना आपण करावा हिच शिकवण मिळते.

💐💐💐💐💐💐💐💐💐💐💐💐💐💐💐

                                          😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : मेधा पाटकर 😊

💐 नर्मदा बचाव आंदोलनाच्या प्रणेत्या,सामाजिक कार्यकर्त्या : मेधा पाटकर.💐

       

                   तिचा जन्म मुंबई येथे 1 डिसेंबर 1954 मध्ये झाला.वडील वसंत खानोलकर  सामाजिक व राजकीय दृष्ट्या जागरूक होते.भारतीय स्वातंत्र्य संग्रामात त्यांचा सहभाग होता.तर तिची इंदुमती आई महिलांच्या अडचणी सोडवणाऱ्या सामाजिक संस्थेला जोडलेल्या होत्या.समाजसेवेचा वारसा तिला जन्मजात मिळाला होता.कुठलाही अन्याय होत असेल तर सहन करायचा नाही हेच ती लहानपणापासून शिकत आली.पुढे ती मुलगी टाटा सामाजिक शास्र संस्थेतून एम.ए ची पदवी मिळवते.याच शिक्षण संस्थेत काही दिवस शिक्षिका म्हणून काम करते.सात वर्षे मुंबईमध्ये विविध स्वयंसेवी संस्थेत काम करते.हे करताना ती नर्मदा बचाव आंदोलनाचे असे काही नेतृत्व करते की सरकारला तिच्या आंदोलनाची दखल घ्यावी लागते.देशभर हे आंदोलन प्रचंड गाजते.असे अनेक वर्षे समाजकार्य  करून अनेकांचे संसार सुखाचे करणारी ती मुलगी म्हणजे सामाजिक कार्यकर्त्या मेधा पाटकर.                               

               त्यांनी समाजासाठी अख्खे आयुष्य पणाला लावले.त्यांच्या याच कार्याचा गौरव म्हणून त्यांना मातोश्री रमाबाई आंबेडकर, महात्मा फुले, दिनानाथ मंगेशकर,मानवी हक्क रक्षक यासारखे अनेक मानाचे पुरस्कार प्रदान करण्यात आले. प्रति नोबेल पारितोषिक ज्याला म्हटले जाते असा स्वीडन सरकारचा  राईट लाईव्ह लिहूज अवार्ड मेधा ताई यांना देण्यात आला.मेधाताई 35 वर्षांपासून नर्मदा बचाव आंदोलनातर्गत नर्मदा नदीवरील सरदार सरोवर धरणामुळे स्थलांतरित झालेल्या लोकांच्या हक्कासाठी लढत आहेत.नर्मदा खोऱ्यातील आदिवासी,शेतकरी,मजूर,मासे कामगार यांच्या  न्याय हक्कांसाठी मेधाताई आजही लढत आहे.   

              2005 साली मुंबई मधील झोपडपट्टी पुनर्वसन मध्ये बिल्डर लोकांनी या लोकांना फसवले या विरोधात त्यांनी केलेले घर बचाओ घर बनावो हे आंदोलन प्रचंड यशस्वी झाले.नॅशनल अलायन्स ऑफ पीपल्स मूव्हमेंट ही त्यांनी स्थापन केलेली संस्था शांती,न्याय, यांची दडपशाही करणाऱ्या विरोधात काम करते.मेधाताई या ज्या समाजाला कुणीच आधार नाही अशा वंचित,विस्थापित, गरीब समाजासाठी आतापर्यंत लढत, झगडत आल्या आहेत.त्यांचे रहाणे जसे अगदी साधे आहे तसे त्यांचे आयुष्यही प्रेरणादायी आहे.त्यांच्या जीवनाकडे पाहताना आपल्याला हीच शिकवण मिळते तुमच्यात अन्यायाविरुद्ध लोक एकत्र आणण्याची क्षमता असेल तर नक्की लाखो लोकांचे नेतृत्व करा.ते लोकच तुम्ही काही न करता तुम्हाला उच्च शिखरावर पोहचवतील.

💐💐💐💐💐💐💐💐💐💐💐💐💐💐💐

                                          😊 संकलन 😊

                                       श्री. भरत पाटील.

😊 प्रेरणादायी व्यक्तिमत्त्व : जाधव पायेग 😊

💐 चौदाशे एकर वाळवंटी भागात मानवनिर्मित घनदाट जंगल निर्माण करणारा ,निसर्गरक्षक अवलिया,दि फॉरेस्ट मॅन : जाधव पायेग 💐

      

               आसाम राज्यातील जोरहाट येथे त्याचा जन्म 1963 मध्ये झाला.ब्रह्मपुत्रा नदीच्या काठावरील हे शहर.तो येथील माजूली बेटावर राहत असे.नदीला पूर आला की ती अक्राळविक्राळ रूप धारण करत असे आणि सगळे काही नष्ट होत असे.हे सगळे पाहून त्याचे मन अस्वस्थ होत असे.तो 16 वर्षाचा असताना  याचे कारण बेटवरील लोकांना विचारले तर या मातीत झाडे येत नाही,म्हणून पाणी अडायला जागा नाही असे त्याला सांगितले. तो वनविभागाकडे झाडे आणायला गेल्यावर त्याच्याकडे आश्चर्याने पाहिले जाते.त्याची समजूत काढावी म्हणून त्याला बांबूची झाडे दिली जातात.तो ती झाडे लावतो वाढवतो. त्याला झाडे लावायचा छंदच लागतो.पुढे तो मुलगा सुमारे 36 वर्षे अव्याहत पणे इतकी झाडे लावतो की सुमारे चौदाशे एकरवर जंगल उभे करतो.त्याच्या या कार्याची नोंद भारतातच नाही तर जगात घेतली जाते.हे अशक्यप्राय काम करणारा तो मुलगा म्हणजे द फॉरेस्ट मॅन जादव पायेग.                                                                              आपण आपल्या घरापुढे झाडे लावतो.फार तर बगीचा करतो पण या अवलिया माणसाने चौदाशे एकर जंगल उभे करून अनेक प्राणी,पशू, पक्षी यांना हक्काचे घर दिलेच पण आपल्या वेगळ्या कामाने  अवघ्या जगाला तोंडात बोटे घालायला लावली.त्यांच्या या कार्याचा गौरव म्हणून त्यांना पदमश्री,फॉरेस्ट मॅन ऑफ इंडिया, आसाम व काझीरंगा विध्यापीठाकडून डॉक्टरेट,यासारखे सन्मान मिळाले.त्यांनी निर्माण केलेल्या मुलाई कथोली  या जंगलावर ब्रिटन मध्ये तयार केलेल्या डॉक्यूमेंट्रीला अनेक पुरस्कार मिळाले.                               फक्त दहावी शिक्षण झालेल्या जादव यांनी तयार केलेल्या जंगलात हजारो दुर्मिळ औषधी वनस्पती आहेत.रॉयल टायगर,पट्टेरी वाघ,अस्वल,हरणे,गवे, असे अनेक प्राणि येथें हक्काने राहतात. सासरी रहाणारी मुलगी जशी काही दिवस माहेरी येते तसे काझीरंगा मधून गेंडे तर अरुणाचल प्रदेश मधून हत्ती येथे तीन चार महिने मुक्कामी येतात आणि विशेष म्हणजे परत जातात.बांबू,साग,काटेसावर,सुबाभूळ,कदंब,ऐन असे 110 प्रकारचे वृक्ष या जंगलात आढळतात.

              जादव याचे इतके मोठे काम आधी कुणालाही माहीत नव्हते.जितू कालीता या पत्रकाराने प्रतीक मासिकातून हे काम जगासमोर आणले.मग आसाम राज्य सरकार व भारत सरकार यांनी जादव यांना या कामात वनविभागाची फौज दिली.जादव यांचा 20 बाबूंच्या रोपांपासून  सुरू झालेला प्रवास इतका दूरवर गेला की पाहणाऱ्या लोकांच्या नजरा कमी पडल्या.यावरून एकच शिकवण मिळते वेगळे काम करताना मी एकटा आहे असा कधीच विचार करू नका.तो एकटेपणाच कदाचित तुमच्या हातून तुम्ही एक दंतकथा बनून जाल असे काम घडविल.

💐💐💐💐💐💐💐💐💐💐💐💐💐💐💐

                                        😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : महेंद्रसिंग धोनी 😊

💐 भारतीय क्रिकेटचा सर्वात यशस्वी कर्णधार ,षटकारांचा बादशहा दी कॅप्टन कूल : महेंद्रसिंग धोनी .💐

     

      बिहार राज्यातील रांची मध्ये त्याचा जन्म 7 जुलै 1981 मध्ये झाला.त्याचे वडील पानसिंह हे मेकॉन येथे कनिष्ठ पदावर व्यवस्थापक तर आई देवकीदेवी ही गृहिणी.रांची मधील श्यामली मधील जवाहर विद्या मंदिर येथे त्याचे शालेय शिक्षण झाले.लहानपणीच त्याला खेळाची प्रचंड आवड होती.तसा तो शाळेत असताना अँथलेटिक्स चा विद्यार्थी.फुटबॉल आवडता खेळ म्हणून तो शालेय टीममध्ये  तो गोलकीपर होता.पण एक दिवस त्याचे फुटबॉल प्रशिक्षक त्या मुलाला स्थानिक क्रिकेट क्लब मध्ये विकेटकीपर म्हणून पाठवतात तेथून पुढे त्याला क्रिकेट खेळाची इतकी आवड लागते की त्या खेळाच्या सर्व प्रकारात आपले कर्तृत्व सिद्ध करतो.तो मुलगा म्हणजे द कॅप्टन कूल महेंद्रसिंग धोनी उर्फ माही.      

                माही याने क्रिकेट खेळात दिलेल्या योगदानाबद्दल त्याला राजीव गांधी खेलरत्न,पदमश्री,पदमविभूषण,ICCप्लेअर ऑफ द इयर,डॉक्टरेट यासारखे सन्मान मिळाले.कपिल देव नंतर इंडियन आर्मीचे सन्मानपद मिळवणारा खेळाडू म्हणजे माही.ICC टी ट्वेन्टी विश्वचषक 2007,एशिया चषक 2010,व 2016, ICC विश्वचषक 2011,चॅम्पियन ट्रॉफी 2013, या आंतरराष्ट्रीय क्रिकेट स्पर्धात माही ने कर्णधार म्हणून अभूतपूर्व यश मिळवले.IPL या देशांतर्गत स्पर्धेतही चार वेळा चषक जिंकत तो कर्णधार म्हणून यशस्वी झाला.  कर्णधार म्हणून तीनशे पेक्षा अधिक सामने खेळणारा माही जगातील एकमेव कर्णधार आहे.

               खेळाची आक्रमक शैली मैदानात प्रचंड संयम,सर्वोत्तम *फिनिशर, साहसी रोमांचक व्यक्तीमत्त्व यामुळे माही वेगळा खेळाडू ठरतो.क्रिकेटच्या कसोटी,एकदिवसीय,ट्वेन्टी या तीनही प्रकारात  साडेचारशे पेक्षा अधिक सामने खेळणारा माही अनके तरुणांचा आदर्श यासाठी आहे की कितीही यश मिळवले तरी आपले पाय कायम जमिनीवर हवे हे माहीने कृतीतून दाखवून दिले आहे.देवधर ट्रॉफी मधून भारतीय क्रिकेटला हा अनमोल हिरा मिळाला.बारावी नंतर शिक्षणाला रामराम करणाऱ्या माहीने काही दिवस रेल्वेत तिकीट चेकर म्हणूनही नोकरी केली.एम.एस.धोनी अनटोल्ड स्टोरी हा त्याच्या जीवनावर आलेला चित्रपट प्रचंड गाजला. एका छोट्या गावातून आलेला मुलगा क्रिकेट मध्ये येतो आणि इतके अफाट यश मिळवतो हे अजिबात सोपे नव्हते. त्यामागे होता त्याग,समर्पण,प्रचंड जिद्द,काय करायचे आहे याची पूर्ण माहिती,दृढ निश्चय, म्हणूनच माही इतरांपेक्षा वेगळा आणि यशस्वी ठरतो.

💐💐💐💐💐💐💐💐💐💐💐💐💐💐💐💐

                                       😊 संकलन 😊

                                       श्री. भरत पाटील.

😊 प्रेरणादायी व्यक्तिमत्त्व : आर आर पाटील.😊

💐 साधा, सोज्वळ, निरलस, राजकारणापलीकडील व्यक्ती : रावसाहेब रामराव पाटील.💐

       

              त्याचा जन्म सांगली जिल्ह्यातील तासगाव मधील अंजनी गावात झाला.वडील रामराव तर आई भगिरथी यांची प्रचंड गरिबी.त्याच्या घरात जणू अठरा विश्व दारिद्र्यच.तो प्रसंगी जुनी,फाटलेली कपडे शिवून वापरतो. वडील वारल्यानंतर त्यांचे कपडे फेकून देण्याऐवजी तो परिस्थितीमुळे ते वापरतो.कमवा शिका योजनेतून प्रचंड कष्ट करून बी .ए होतो.प्राचार्य बी.पी.पाटील त्याच्यासाठी  देवदूत ठरतात. पुढे तो एल एल बी करतो.इतक्या कठीण परिस्थितीतही तो मुलगा खचत नाही.तो राजकारणात येतो.आणि त्यात इतका यशस्वी होतो की महाराष्ट्र राज्याची ग्रामविकास, गृहमंत्री, उपमुख्यमंत्री ही अत्यंत महत्त्वाची पदे भूषावतो.हे सगळे यश मिळवणारा तो मुलगा म्हणजे   राजकारणातील निष्कलंक, निरलस व्यक्ती रावसाहेब रामराव पाटिल उर्फ आर.आर.आबा.

                    आबा यांनी राजकारण करताना समाज कारणावर कायम भर दिला कारण ते स्वतः अतिशय गरीब परिस्थितीतून पुढे आले होते.म्हणूनच ते गृहमंत्री  असताना त्यांनी डान्सबार बंदी केली आणि अनेक संसार पुन्हा उभे केले.ग्रामविकास मंत्री असताना संत गाडगेमहाराज ग्रामस्वच्छता अभियान सुरू केले यामुळे अनेक गावे स्वच्छ झाली.या अभियानाची दखल  अगदी संयुक्त राष्ट्र संघाने घेतली.गावातील तंटे गावातच मिटावे म्हणून महात्मा गांधी  तंटामुक्त गाव अभियान त्यांनी सुरू केले.गडचिरोली जिल्ह्याचे पालकत्व त्यांनी स्वतः स्वीकारले होते.1979 ते 1990 पर्यंत जिल्हा परिषद सदस्य व 1990 पासून 2014 पर्यंत सलग विधानसभा आमदार असणारे आबा सुरुवातीला तासगाव चे प्रतिनिधित्व करत नंतर कवठेमहांकाळ चे नेतृत्व त्यांनी केले.            

                   कोणतीही राजकीय पार्श्वभूमी नसताना काळजाला भिडणारी भाषाशैली,स्वच्छ प्रतिमा, समाजासाठी काहीतरी करण्याची जिद्द या साऱ्या गुणांमुळे आबा वेगळे ठरतात. ते इतके मोठे झाले तरी त्यांच्यातील राजकारणी कधीच गर्विष्ठ झाला नाही.सत्ता येते जाते पण आपल्या सोबतचे लोक कायम असतात असे ते नेहमी म्हणायचे.त्यांचे कुटुंबीयही अगदी साधे आयुष्य जगत आले आहे.आपला पराभव गरिबी कधीच करीत नाही फक्त जे निसर्गाने दिले आहे कर्तबगारीने घालवू नये असे आबांचे मत होते.आबा कर्करोगाने 16 फेब्रुवारी 2015 रोजी गेले तेव्हा लाखो लोकांच्या डोळ्यात पाणी होते.जाता जाता ही आबा हेच सांगून गेले की तुम्ही जगताना  इतरांना किती आनंदाचे क्षण दिले ,किती लोकांना आपल्या घासातील घास दिला,अडचणीच्या वेळी कितीदा पाठीवर हात ठेवून आधार दिला यावरच तुम्ही गेल्यावर तुमची किंमत ठरते.तुमच्याकडे किती अफाट संपत्ती आहे यावर नाही.

💐💐💐💐💐💐💐💐💐💐💐💐💐💐💐💐

                                        😊 संकलन 😊

                                       श्री. भरत पाटील.

😊 प्रेरणादायी व्यक्तिमत्त्व : बच्छेन्द्री पाल 😊

💐 माऊंट एव्हरेस्ट सर करणारी पहिली भारतीय महिला : बच्छेन्द्री पाल 💐

  

             उत्तराखंड मधील उत्तरकाशी नकुरी येथे तिचा जन्म 25 मे 1954 मध्ये झाला.लहानपणापासून ती अभ्यासात चांगली होती.पुढे ती बी एड पर्यंत चे शिक्षण घेते.हुशार असूनही तिला कुठेही कायमस्वरूपी नोकरी मिळत नाही.तात्पुरत्या नोकऱ्यांना कंटाळून ती नोकरी करण्याऐवजी  नेहरू इन्स्टिट्यूट ऑफ माउंट कॅम्प मध्ये अर्ज दाखल करते.येथून पुढे तिच्या आयुष्याला नवीन दिशा मिळते.मग ती मुलगी मागे वळून पहात नाही.आपल्या मेहनतीच्या जोरावर गिर्यारोहिका बनते.पुढे ती मुलगी 23 मे 1984 मध्ये  सागरमाथा एव्हरेस्ट च्या शिखराच्या 29028 फूट (8848मीटर)उंचीवर भारताचा  तिरंगा डौलाने फडकवते. एव्हरेस्ट शिखर सर करणारी  भारतातील ती पहिली महिला ठरते.हा मान मिळवणारी ती मुलगी म्हणजे एव्हरेस्ट वीरांगना बछेंद्रि पाल.                                                               1984 साली भारताचे चौथे एव्हरेस्ट अभियान सुरू झाले याची एक टीम बनवली होती.यात  पाल या एक होत्या. त्यांच्या या अतुलनीय साहसाबद्दल त्यांना भारतीय पर्वतारोहन फाउंडेशन कडून सुवर्ण पदक,पदमश्री,अर्जुन पुरस्कार, उत्तर प्रदेश शिक्षण विभाग सुवर्णपदक,कोलकता लेडीज ग्रुप स्टडी अवार्ड,नॅशनल अडवव्हेंचर अवार्ड भारत सरकार,मध्य प्रदेश सरकारकडून वीरांगना लक्ष्मीबाई राष्ट्रीय सन्मान यासारखे असंख्य सन्मान मिळाले.                                                         1994 मध्ये गंगा नदी मध्ये हरिद्वार ते कलकत्ता पर्यंत 2500 किमी पर्यंत लांब नौका अभियानाचे नेतृत्व त्यांनी केले.हिमालयातील भूतान,नेपाळ, लेह आणि सियाचीन येथून पुढे जात काराकोरम पर्वत शृंखलावर जाऊन थांबणारा 4000 किमीचा पल्लाही त्यांनी पूर्ण केला होता.येथेही जाणाऱ्या त्या पहिल्या भारतीय महिला होत्या.पाल यांनी सुरुवातीला गिर्यारोहण हा पेशा  निवडला तेव्हा नातेवाईक,परिवार यांचा  प्रचंड विरोध झाला.पण पाल यांचा निश्चय पक्का होता.त्या कुठेही डगमगल्या नाही .आपल्या ध्येयापासून विचलित झाल्या नाहीत.त्यांनी प्रचंड मेहनत घेत हेच दाखवून दिले की जगातील उंचावरील शिखरावर महिला जाऊ शकते.जशी ती नैसर्गिक शिखरावर पोहचू शकते तशी ती दृढनिश्चयी झाली तर कोणत्याही परिस्थितीत,कोणत्याही क्षेत्रात,अतिउच्च स्थान मिळवू शकते.कारण पोलादी कणखरता फक्त स्त्री कडेच असते.

💐💐💐💐💐💐💐💐💐💐💐💐💐💐

                                          😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : हर्षिनी कान्हेकर 😊

💐 पहिली भारतीय महिला अग्निशमन अधिकारी,फायर वूमन : हर्षिनी कान्हेकर 💐

         

              महाराष्ट्र राज्याची उपराजधानी नागपूर येथे तिचा जन्म झाला.तिचे वडीलपाटबंधारे विभागात कार्यरत होते.ती शाळेत असताना अभ्यासापेक्षा इतर उपक्रमात अधिक सहभागी होत असे.यातूनच तिने एन. सी .सी.मध्ये प्रवेश घेतला.मग मात्र तिला वर्दीचे आकर्षण वाटू लागले.कुठलीही वर्दी आपल्या अंगावर हवी ही तिची जिद्द होती.यातूनच अग्निशामक अभियांत्रिकीची परीक्षा ती देते.अग्निशामक सेवा विद्यालयात फक्त 30 जागा असतात यात ती निवडली जाते.महिला आणि अग्निशमन विभागात अशा सर्वांच्या नजरा असतात कारण याआधी असे कधी घडले नव्हते.महिला असूनही कोणतीही सवलत न घेता ती मुलगी सात सेमिस्टर चा अभ्यास यशस्वीपणे पूर्ण करते.आणि ती मुलगी पुढे भारतातीलच नाही तर दक्षिण पूर्व आशियातील पहिली महिला अग्निशमन अधिकारी बनते.ती प्रचंड जिद्दी मुलगी म्हणजे फर्स्ट फायर वूमन हर्षिनी कान्हेकर.                        

             हर्षिनी यांनी पुरुषांचे वर्चस्व असणाऱ्या अग्निशमन विभागाला आपले करियर म्हणून निवडले.प्रचंड मेहनत घेऊन त्यांनी कोलकत्ता व दिल्ली येथे खडतर प्रशिक्षण पूर्ण केले.पुरुषांमध्ये हर्षिनी या एकमेव मुलगी असल्यामुळे त्यांना आपोआप प्रसिद्धी मिळाली.पण त्याचा कुठेही गाजावाजा त्यांनी केला नाही.आपले काम निष्ठेने करत राहिल्या. मुंबई येथे ONG विभागात अग्निशमन अधिकारी म्हणून काम करताना त्यांनी अचानक लागलेल्या आगीशी सामना कसा करावा याबाबत मोठी जागृती केली.                       

            हर्षिनी यांच्या कार्याचा भारत सरकारने पहिल्या अग्निशमन अधिकारी म्हणून राष्ट्रपतींच्या हस्ते गौरव केला आहे. तसेच नीती आयोग व संयुक्त राष्ट्र यांच्यातर्फे 'ट्रान्सफार्मिंग वूमन ऑफ इंडिया 'हा सन्मान देण्यात आला आहे.हर्षिनी या क्षेत्रात आल्या तेव्हा ही कोण कुठली?आमच्या क्षेत्रात तुमचे काय काम?असे प्रश्न नजरेच्या मागे दडले होते.पण हर्षिनी यांचा दृढ निश्चय त्यांना इथपर्यंत घेऊन आला आणि प्रचंड यश देऊन गेला.त्यांचे आयुष्य हाच संदेश देते की स्त्री ही अतुलनीय धैर्याचे प्रतीक आहे,तिची जिद्द भली भली संकटे सहज परतवून लावते. तिने मनात आणले तर ती पुरुष वर्चस्व असणारे कोणतेही बुरुंज तोडण्यात यशस्वी होते.

💐💐💐💐💐💐💐💐💐💐💐💐💐

                                          😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : गुंजन सक्सेना 😊

 💐 पहिली महिला सशस्त्र भारतीय पायलट,कारगिल गर्ल : गुंजन सक्सेना.💐

              लष्कराचा वारसा असणाऱ्या घरात तिचा जन्म 4 जून 1975 मध्ये झाला.वडील आणि भाऊ भारतीय लष्करात असल्यामुळे तीही लष्करात जाण्याचा निर्णय घेते. दिल्ली येथील हंसराज कॉलेज मधून आपले शिक्षण ती पूर्ण करते.त्याचबरोबर सफरजंग फ्लाईंग क्लब मध्येही तीने पायलट चे बेसिक शिक्षण पूर्ण केल्यावर भारतीय सशस्त्र दलाची परीक्षा ती उत्तीर्ण होते.ही परीक्षा उत्तीर्ण होणारी 25 प्रशिक्षित पायलट मध्ये ती एकमेव महिला पायलट असते.पुढे ती मुलगी आपल्या अदभुत धाडसाने  कारगील युद्धात आघाडीवर हेलिकॉप्टर चालवून अनेक जखमी सैनिकांचे प्राण वाचवते.हे अतुलनीय शौर्य गाजवणारी ती मुलगी म्हणजे गुंजन सक्सेना.

            गुंजन यांनी कारगील युद्धात जे अचाट धाडस दाखवले त्याबद्दल त्यांचा शौर्य पदक देऊन सन्मान केला आहे.हा सन्मान मिळवणाऱ्या त्या पहिल्या महिला पायलट आहेत.कारगील युद्धात जखमी सैनिकांना प्राथमिक उपचार, जेवण पोहचवणे हे काम त्यांनी आपल्या 'चिता हेलिकॉप्टर 'च्या सहाय्याने उत्साह व चपळतेने  केले.पाकिस्तानच्या हालचालींवर देखरेख ठेवताना त्यांच्या चिता हेलिकॉप्टर वर एकदा हल्लाही झाला त्यातून त्या थोडक्यात बचावल्या.पण न डगमगता त्यांनी पुन्हा युद्धात  आपले काम सुरू ठेवले.                 

              कारगील युद्धात  सैनिकांना मदत करणाऱ्या 10 पायलट बरोबर काम करणाऱ्या एकमेव महिला पायलट गुंजन सक्सेना होत्या.नवीन पायलट असूनही तेरा हजार फुटावर हेलिकॉप्टर उडवून  त्यांनी 20 दिवसात 10 वेळा सैनिकांना अशी मदत केली.त्यांनी विजय व सफेद सागर या मोहिमा यशस्वी केल्या.त्यांच्या या शौर्याचा गौरव म्हणून त्यांना भारत सरकारने 'The kargil girl 'ही उपाधी सन्मानाने दिली आहे. जान्हवी कपूर या अभिनेत्रीने भूमिका  केलेला त्यांच्या जीवनावरील' गुंजन सक्सेना द कारगील गर्ल 'हा चित्रपट प्रचंड गाजला आहे.गुंजन यांना पाकिस्तानी सीमेलगत अनेक वेळा जावे लागत असे.जीवाला प्रचंड धोका असे पण त्या कधीही डगमगल्या नाही.त्यांचे जीवन समस्त महिला वर्गाला हाच  संदेश देते की तुमच्यामध्ये  प्रचंड आत्मविश्वास व चिकाटी असेल तर एक स्त्री मनात आणले तर कोणत्याही क्षेत्रात यशस्वी होतेच होते .

💐💐💐💐💐💐💐💐💐💐💐💐💐

                                        😊 संकलन 😊

                                         श्री. भरत पाटील.

😊 प्रेरणादायी व्यक्तिमत्व: डॉ. माधुरी कानिटकर 😊

💐  महाराष्ट्रातील पहिली व देशातील तिसरी महिला लेफ्टनंट जनरल : डॉ.माधुरी कानिटकर.💐

        

            तिचा जन्म कर्नाटक राज्यातील धारवाड येथे 15 ऑक्टोबर1960 मध्ये एका मराठी कुटूंबात झाला.वडील चंद्रकांत इंजिनिअर तर आई हेमलता प्राध्यापिका.आजी आजोबा प्रमाणे आपणही डॉक्टर व्हावे अशी तिची सुरुवातीपासून मनातील इच्छा होती.पुढे ती पुणे येथील फर्ग्युसन महाविद्यालयात बारावी पर्यंत चे शिक्षण घेते. ती मुलगी ठरवून लष्करातील सैन्याला आरोग्य सेवा देणारे डॉक्टर ज्या ठिकाणाहून शिक्षण घेतात अशा ए.एफ.एम.सी कॉलेजला एम.बी बी.एस.ला प्रवेश घेते.एम बी बी एस च्या तिन्ही टप्यात प्रथम येण्याचा पराक्रम करते.तिला आर्म फोर्सेस मेडिकल कॉलेज(AFMC) मध्ये राष्ट्रपतींच्या हस्ते सुवर्ण पदक मिळते.शिशुरोग तज्ञ  यात ती एम डी पर्यंत शिक्षण घेते.पुढे भारतीय लष्करातील रणगाडा विभागात देशसेवेसाठी दाखल होते.स्वतःची प्रचंड मेहनत,कामाप्रति निष्ठा या जोरावर ती मुलगी महाराष्ट्रातील पहिली व देशातील तिसरी महिला लेफ्टनंट जनरल बनते.ती मुलगी म्हणजे लेफ्टनंट जनरल डॉ.माधुरी कानिटकर.              

             डॉ.माधुरी यांनी देशासाठी दिलेल्या योगदानाबद्दल त्यांचा विशिष्ट सेवा पदक,अति विशिष्ट सेवा पदक देऊन सन्मान केला आहे.पंतप्रधान कार्यालयातील सायन्स टेकनोलॉजी विभागाच्या सल्लागार समिती सदस्य त्या राहिल्या आहेत. AFMC  मेडिकल कॉलेज मध्ये प्राध्यापक, शिशु विभाग प्रमुख, अनेक विदयापीठाच्या परीक्षक,कॉन्बॉट मेडिसिन प्रमुख असणाऱ्या पहिल्या महिला अधिकारी,यासारख्या असंख्य जबाबदाऱ्या त्यांनी यशस्वीपणे पेलल्या. "मी स्वतःला कधीच कुठे कमी समजले नाही,लष्करात जाणे  माझे स्वप्न होते ते मी जगले आणि पूर्ण केले "हे त्या आवर्जून नमूद करतात.                                

              भारतीय लष्करातील पहिल्या प्रशिक्षित पीडियाट्रिक नेफ्रोलॉजिस्ट म्हणजे डॉ.माधुरी कानिटकर. लष्करात जेथे कायम स्वरूपी हॉस्पिटल नाहीत अशाही जागी त्यांनी तात्पुरत्या बराकित राहून लष्कर सेवा केली.आसाम, अरुणाचल प्रदेश, दक्षिण व उत्तर भारत अशा अनेक ठिकाणी त्यांनी देशसेवा केली.संदेशवहनाची अत्यंत कमी साधने त्या काळी होती,पती-पत्नी एकत्र धोरण अमलात आले नव्हते असे असताना पती राजीव यांचा दुरावा सहन करत 24 वर्षे इतर  ठिकाणी सेवा केली.पती राजीव कानिटकर व डॉ.माधुरी कानिटकर हे पती-पत्नी दोघेही स्वतःच्या कर्तृत्वावर भारतीय लष्करात लेफ्टनंट जनरल झाले.असे लष्कर इतिहासात कधीही झाले नाही.लष्करातील निवृत्ती नंतर नाशिक मधील महाराष्ट्र आरोग्य विधदयापीठाच्या कुलगुरू असणाऱ्या डॉ.माधुरी यांच्या जीवनाकडे पाहताना हीच शिकवण मिळते की लष्करात मुलींनी सेवा करणे ज्या काळात केवळ एक स्वप्न होते.त्या मात्र ते स्वप्न जगल्या आणि यशस्वी झाल्या.म्हणून आयुष्याकडे सकारात्मक दृष्टीने पहा संयम ठेवा. यशस्वी होण्याची वेळ प्रत्येकाची येत  असते.

💐💐💐💐💐💐💐💐💐💐💐💐💐

                                      😊 संकलन 😊

                                     श्री. भरत पाटील.

😊 प्रेरणादायी व्यक्तिमत्त्व : मीरा बोरवणकर 😊

 💐 कर्तव्यदक्ष, तडफदार, लेडी सुपरकॉप आय पी एस :- डॉ मीरा बोरवणकर-चड्डा 💐

             

             पंजाब राज्यातील फाजिल्का येथे  तिचा जन्म झाला.तिचे वडील ओ.पी.चड्ढा बॉर्डर सिक्युरिटी फोर्स म्हणजेच BSF मध्ये अधिकारी होते.तिचे मॅट्रिक पर्यंत चे शिक्षण फाजिल्का येथे तर इंग्रजी साहित्यात एम .ए .जालंधर येथे झाले.सुरुवातीपासून ती प्रतिभावान विद्यार्थीनी होती.वाद विवाद,नाटक,क्रिकेट यात ती कायम सरस कामगिरी करायची.लग्नानंतरही आपले जीवन थांबू नये अशी तिची इच्छा असते.याच जिद्दीतून ती अभ्यासाला सुरवात करते.किरण बेदी यांना ती कायम आदर्श मानत होती. पुढे प्रचंड मेहनत घेऊन ती महाराष्ट्र राज्यातील पहिली महिला पोलिस आयुक्त   बनते. ती मुलगी म्हणजे एक कर्तव्यदक्ष,तडफदार,लेडी सुपरकॉप  आय. पी. एस .डॉ मीरा बोरवणकर-चड्ढा.                            मीरा यांनी मुंबई पोलीस उपायुक्त, जिल्हा पोलीस अधीक्षक औरंगाबाद, राज्य सी.आय.डी गुन्हेशाखा,CBI ची अपराध शाखा मुंबई, CBI भ्रष्टाचार प्रतिबंधक विभाग डी.आय.जी यासारखी अत्यंत महत्त्वाची पदे त्यांनी भूषवली.या शतकात मुंबई गुन्हे अन्वेषण विभागात प्रमुख असणाऱ्या एकमेव महिला म्हणजे मीरा बोरवणकर.त्यांच्या अतुलनीय कार्याचा गौरव म्हणून राष्ट्रपती सेवा पुरस्कार, पोलीस सेवा पुरस्कार त्यांना प्रदान करण्यात आला आहे.

        मुंबई मधील माफिया राज कमी करून त्यांनी कठोर अधिकारी ही आपली प्रतिमा अधिक दृढ केली.जळगाव  जिल्ह्यात शालेय मुलींना देह व्यापारात गुंतवणाऱ्या टोळीचा पर्दाफाश करून त्यांनी आपण लेडी सुपरकॉप आहोत हे दाखवून दिले.त्यावेळी त्यांनी अनेक प्रतिष्ठित लोकांना अटक करताना कुणाचीही गय केली नाही.त्यांच्या जीवनावर राणी मुखर्जी या अभिनेत्रीने भूमिका केलेला 'मर्दानी' हा चित्रपट प्रचंड गाजला.पाकिस्तानी दहशतवादी याकूब मेमनला त्यांच्याच निगराणी खाली फाशी दिली गेली.आय.ए. एस.असणारे  अभय बोरवणकर हे पती म्हणून मीरा यांच्या पाठीशी कायम भक्कमपणे उभे राहिले.मीरा या ज्या काळात आय.पी.एस झाल्या तो काळ मुलींनी फार शिकण्याचा नव्हता,पण त्या थांबल्या नाहीत.वाहत राहिल्या झऱ्यातील स्वच्छ सुंदर नितळ  पाण्यासारख्या.आणि यशस्वी अशा झाल्या की सर्वांनी त्यांच्या कार्याला सलाम केला. त्यांचे आयुष्य हेच शिकवण देते सतत वाहते रहा,आपले विचार प्रवाही ठेवा.आपण थांबलो की साचलेपणा येतो.आपल्या जीवनाचा आनंद रोज नव्याने जगण्यातच आहे.

💐💐💐💐💐💐💐💐💐💐💐💐💐

                                         😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : कल्पना चावला 😊

 💐 पहिली भारतीय अवकाशयात्री : कल्पना चावला. 💐

   

              हरियाणा राज्यातील कर्नाल येथे तिचा जन्म 17 मार्च 1962 साली झाला.आई संयोगीता,तर वडील बनारसीदास यांचा  स्वतःचा टायर चा व्यवसाय होता.तिला लहानपणी सर्वजण मॉन्टी म्हणत असे.रात्रीच्या वेळी गच्चीवर जाऊन बसून तिला चांदण्या पहाणे खुप आवडत असे.तिच्या खोलीत चांदण्या,विमान,रॉकेट यांची चित्रे लावलेली असे.ती लहानपणी अत्यंत तल्लख बुद्धीची होती.कर्नाल सारख्या गावात मुलींनी शिकावे असे वातावरण नव्हते.सोळा सतरा वर्षाची मुलगी झाली की लग्न करून देत असे.पण वडिलांनी सर्व विरोध झुगारून लेकीचा विमान विद्या म्हणजेच पंजाबच्या एअरोनॉटिकल इंजिनिअरिंग कॉलेज ला प्रवेश घेतला.तिनेही या संधीचे सोने करत अगदी शेवटच्या वर्षी अमेरिकेत जाऊन याचे शिक्षण घेते.यात एम सी,डॉक्टरेट होण्याचा अनोखा पराक्रम ती करते.पुढे ती मुलगी अमेरिकास्थित भारतातील पहिली अंतराळवीर बनते.हे अद्भुत यश मिळवणारी ती मुलगी म्हणजे एक तेजस्वी चांदणी कल्पना चावला.              

              मोठमोठया पगाराच्या नोकऱ्या तिला मिळत होत्या. पण तिचे ध्येय होते अंतराळात जाणे.पुढे कल्पना यांची अनेक स्पर्धकातून नासा ने संस्थेत निवड केली.1975 पासून रीतसर  अंतराळवीर  प्रशिक्षण सुरू होते.पुढे1997 मध्ये तिची कोलंबो यानाची  'मिशन स्पेसिलिस्ट'म्हणून निवड  होते.16 दिवस अनेक महत्त्वाचे प्रयोग करून ती पृथ्वीवर परत येते.त्यावेळी देशभर दिवाळी साजरी होते.2003 साली पुन्हा तिची याच मिशन साठी निवड होते.अंतराळवीर ठरल्याप्रमाणे  सर्व मोहीम यशस्वी करून पृथ्वी कडे परतत होते.पण हे यान पृथ्वीवर परत येताना यानाचे उष्णतेपासून संरक्षण करणाऱ्या विटातील एक वीट केव्हातरी कोसळली होती. हवेच्या घर्षणाने  यानाचे तापमान 1200 सेल्सिअस पर्यंत वाढले आणि काही कळायच्या आत यानाचे तुकडे तुकडे झाले. कल्पनाजी सह सर्व अंतराळवीरांची काळी ठिक्कर पडलेली शरीरे क्षणात खाली कोसळली.टेक्ससाच्या वाळवंटात  यानाचे अनेक तुकडे विखुरले गेले. 

           भारत सरकारने कल्पनाजी च्या स्मरणार्थ एका उपग्रहाला 'कल्पना' हे नाव दिले आहे.आपल्या देशावर प्रचंड प्रेम असणाऱ्या कल्पनाजी यांनी अमेरिकेत विवाह करूनही आपले स्वतःचे नाव शेवटपर्यंत कल्पना चावलाच ठेवले. ईश्वरावर तिची प्रचंड श्रद्धा होती.तिचे गीतेतील श्लोक  तोंडपाठ होते.आज कल्पनाजी आपल्यात नाहीत पण यांचे  आयुष्य अनेक लोकांना प्रेरणा देत आहे आणि आपल्याला हेच सांगत राहते तुम्हाला आजूबाजूला थोरा मोठ्यांचे सानिध्य लाभले तर तुम्हीही तसाच थोर विचार करता आणि आपले जीवन योग्य मार्गाने घडवता.

💐💐💐💐💐💐💐💐💐💐💐💐💐💐

                                       😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : विश्वास नांगरे पाटील.😊

 💐 कर्तव्यनिष्ठ, रुबाबदार आय पी एस अधिकारी : विश्वास नांगरे पाटील.💐

           

 

               सांगली जिल्ह्यातील शिराळा मधील कोकरूड येथे त्याचा जन्म 1 जून 1973 मध्ये झाला.त्याचे वडील त्या वेळी गावचे सरपंच व पैलवान  होते.आपल्या मुलानेही पैलवान व्हावे अशी त्यांची इच्छा असते.जिल्हा परीषदेच्या शाळेत त्याचे सुरुवातीचे शिक्षण होते. वडील सरपंच असल्यामुळे त्याचा शाळेत दरारा होता शिक्षकही त्याला काही म्हणत नसे.पण एक दिवस शाळेतील बाई त्याच्या कानशिलात लगावतात आणि स्वतःचे अस्तित्व स्वतः तयार कर असे सूनवतात.यातून तो पेटून उठतो .दहावीच्या परीक्षेत तालुक्यात प्रथम येतो.बारावीला उत्तम गुण असतानाही केवळ प्रशासकीय अधिकारी व्हायचे आहे म्हणून तो कला शाखेत प्रवेश घेतो.शिवाजी विद्यापीठातून सुवर्णपदक मिळवून बी ए ची परीक्षा उत्तीर्ण होतो.उस्मानिया विदयापीठातून एम बी ए करतो. तो मुलगा प्रचंड  मेहनत घेऊन भारतीय प्रशासन सेवेत आय पी एस अधिकारी बनतो.तो मुलगा म्हणजे रुबाबदार   व्यक्तिमत्त्व,कर्तव्यदक्ष,संवेदनशील असणारे अधिकारी विश्वास नांगरे पाटील.         

              नांगरे पाटील यांनी आतापर्यंत अहमदनगर जिल्हा पोलीस अधीक्षक, पुणे जिल्हा ग्रामीण पोलीस अधीक्षक,मुंबई पोलीस उपायुक्त, ठाणे जिल्हा ग्रामीण पोलीस अधीक्षक, अप्पर पोलीस आयुक्त मुंबई दक्षिण विभाग,नाशिक पोलीस आयुक्त, सह आयुक्त मुंबई या विविध ठिकाणी सेवा करताना आपल्या कामाचा वेगळा ठसा समाज मनावर उमटवला. 

                अतिशय संवेदनशील अधिकारी म्हणून त्यांची ओळख आहे. पुणे जिल्ह्यातील सिंहगड पायथ्याशी डोंजे गावात झालेल्या रेव्ह पार्टी वर त्यांनी घातलेला छापा प्रचंड गाजला.26/11ला मुंबई वर हल्ला झाला तेव्हा ते कोणत्याही बुलेट फ्रुफ जॅकेट शिवाय ताज हॉटेल मध्ये शिरले.त्यांच्या प्रतिकाराने दहशतवादी  नवीन इमारतीत जाऊ शकले नाही त्यामुळे हजारो लोकांचे प्राण वाचले.याच कार्याचा गौरव म्हणून त्यांना राष्ट्रपती शौर्य पदक प्रदान करण्यात आले.माझे डोळे मिटण्याआधी तू लाल दिव्याच्या गाडीतून घरी ये .वडिलांच्या याच वाक्यामुळे नांगरे पाटील आपले स्वप्न दिवस रात्र जगले.अनेक वेळा अपयश आले,डोळ्यातून पाणीही आले पण खचले नाही.

                 याच जिद्दीने 1997 साली त्यांनी 13 परीक्षेत यश मिळवले. ते आय पी एस झाले त्याच वेळी उपजिल्हाधिकारी, सेल्स टॅक्स इन्स्पेक्टर, पी.एस.आय.फिजिकलटेस्ट असे  एकामागून एक यश  त्यांनी मिळवले होते.तुमच्याकडे प्लॅन बी तयार असेल तर स्पर्धा परीक्षेत अपयश आले तर त्रागा होत नाही असे नांगरे पाटील सांगतात.लहानपणी पहाटे उठून अभ्यास करण्याची सवय लावणारे गायकवाड सरांचे नांगरे पाटील या यशात आभार मानायला विसरत नाही.विश्वास नांगरे पाटील यांच्या जीवनाकडे पाहताना हेच समजते आपले आयुष्य घडवायचा एक विशिष्ट काळ असतो.त्यावेळी उत्तम शिक्षक,आपली जिद्द,योग्य मार्गदर्शन,प्रचंड मेहनत हे सारे गुण तुम्हाला यशापर्यंत घेऊन जातात.

💐💐💐💐💐💐💐💐💐💐💐💐💐💐

                                          😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : गॅलिलिओ गॅलिली 😊

 💐 दुर्बिणीचा संशोधक : गॅलिलिओ गॅलिली 💐

    

            इटली देशातील पिसा टस्कनी येथे त्याचा जन्म 15 फेब्रुवारी 1564 मध्ये झाला.वडील व्हिसेन्झो हे संगीतकार व लोकरीचे व्यावसायिक तर आई गिउलिया ही गृहिणी.परिस्थिती कठीण असूनही वडिलांना आपल्या मुलाने डॉक्टर बनावे असे वाटत असे पण त्याचे मन गणितात अधिक रमत असे.मनात इच्छा  नसूनही तो पिसा विद्यापीठात विज्ञान शाखेत प्रवेश घेतो. तेथे परिस्थितीने शिक्षण अर्धवट सुटते.काही काळ शिकवण्या घेऊन तो उदरनिर्वाह करतो.पुढे पिसा विद्यापीठातच गणिताचा प्राध्यापक म्हणून नोकरीला लागतो.मग मात्र तो।मागे वळून पहात नाही.आपल्या अफाट ज्ञानाच्या बळावर तो अनेक शोध लावतो आणि जगातील पहिला आधुनिक शास्त्रज्ञ बनतो. दुर्बिणीचा अनोखा शोध लावणारा तो मुलगा म्हणजे महान शास्त्रज्ञ गॅलिलिओ गॅलिली.                                 

               लंबकाचे दोलन दोरीच्या लांबीवर अवलंबून असते,घन पदार्थाला गुरुत्व असते,भिन्न वस्तूंचा पडण्याचा वेग सारखाच असतो,चंद्र हा गुळगुळीत नसून त्यावर डोंगर दऱ्या आहेत व तो सूर्य प्रकाशाच्या परावर्तनाने प्रकाशतो,गुरूला चार मोठे तेजस्वी उपग्रह आहेत,शनी लंबगोल आहे,पदार्थाचा गती संबंधी नियम, हे सारे सिद्धांत मांडून त्यांनी प्रयोग करून सिद्ध करून दाखवले.वस्तूचे द्रवातील वजन करण्याचा वजनकाटा,अल्कोहोल चा तापमापक,अरेखनचा कंपास,हे सारे लोकोपयोगी शोध गॅलिलिओ यांनीच लावले.आपले शोध प्रयोगाने सिद्ध करून दाखवण्याचा पायंडा त्यांनी पाडला म्हणूनच गॅलिलिओ यांचा आधुनिक शास्त्रज्ञ म्हणून गौरव केला जातो.                             

               सूर्य पृथ्वी भोवती फिरतो या आधीच्या कल्पनेला गॅलिलिओ यांनी पृथ्वी सूर्याभोवती फिरते असे मत मांडून छेद दिला.यावरून रोमच्या न्यायालयात धर्म पाखंडी म्हणून त्यांच्यावर खटला चालवला गेला.यात त्यांना हे वाक्य मागे घ्यायला लावून शिक्षाही केली.पण त्यांचे पृथ्वी सुर्यभोवती फिरते हे विधान सत्य होते हे जगाला नंतर मान्यच करावे लागले.वस्तूची 32 पट प्रतिमा दिसेल इतकी मोठी दुर्बीण तयार करून अवघे आकाश मुठीत आणणाऱ्या गॅलिलिओ यांना ते जादूटोणा करतात म्हणूनही हिणवले गेले,पण ते थांबले नाही.लोक धर्म द्रोही म्हणत इतक्या अडचणीतून त्यांनी इतके शोध लावले.त्यांच्या आयुष्यातून आपण एकच शिकायचे तुम्हाला अत्यंत प्रतिकूल परिस्थितीतही जे आवडते त्या क्षेत्रात तुमचे कार्य नेटाने करत रहा.त्या कामात सातत्य असेल तर आपली दखल घेतली जातेच जाते.

💐💐💐💐💐💐💐💐💐💐💐💐💐💐

                                         😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : जेन कूम 😊

 💐 संपूर्ण जगाला वेड लावणाऱ्या Whats अँप चा निर्माता : जेन कूम 💐

  

             युक्रेन कीव येथे त्याचा जन्म 24 फेब्रुवारी 1976 मध्ये झाला.तो 16 वर्षाचा असताना काही कौटुंबिक कारणाने त्याची आई वडिलांपासून विभक्त होते.आई आणि आजी बरोबर तो अमेरिकेला येतो.गरिबी, संघर्ष जणू त्याला जन्मताच मिळाला होता.आई आयाचे काम करून कुटुंबाचा गाडा रेटत होती.तो एका दुकानात काम करायचा. पुढे सिलिकॉन व्हॅली मध्ये सरकारी शिक्षण घेऊन तो याहू मध्ये कामाला लागतो. सात वर्षे तेथे नोकरी करून तो ब्रायन ऍक्टन या मित्रांच्या मदतीने फक्त मोबाईल क्रमांकावर चालणारे व सर्वांना सहज संवाद साधता येईल अशी सोशल नेटवर्किंग ॲप बनवतो.ते ॲप अब्जावधी लोकांचे जीवन व्यापून टाकते.ते ॲप म्हणजे Whats app आणि ते तयार करणारा तो मुलगा म्हणजे जेन कूम.     

              जेन याहू मध्ये काम करत असताना त्यांना ब्रायन ऍक्टन मित्र भेटतो दोघे 9 वर्षे काम करून सर्वाना सहज संवाद साधता येईल,फक्त मोबाईल नंबर वर चालेल असे मेसेज ॲप बनवण्याची कल्पना मांडतात.2009 साली ती प्रत्यक्षात उतरवतात.प्रथम फक्त ॲपल मोबाईल वर चालणारे हे ॲप 2010 नंतर स्मार्टफोन मध्ये जसे आले तशी त्याची लोकप्रियता शिखरावर पोहचली.पहिल्या पाच वर्षात 45 कोटी युजर्स असणारे एकमेव ॲप म्हणजे व्हाट्सएप.दोनशे करोड पेक्षा अधिक लोक आज हे ॲप वापरतात. यावरून दररोज सरासरी एक अब्ज मेसेज पाठवले जातात.व्हाट्सएप चे एक वैशिष्ट्य म्हणजे हे वापरत असताना कोणतीही जाहिरात मध्ये येत नाही.फोटो,व्हिडीओ,कागदपत्रे,आपले विचार,मनसोक्त गप्पा, असे सारे तुम्ही यावरून एकमेकांना पाठवू शकता. शिवाय तुमच्या गोपनियेतला कुठेही बाधा येत नाही.व्हाट्सएप पे,व्हाट्सएप बिझनेस ॲप,हे व्हाट्सएपच्या आधुनिक तंत्रज्ञानाचे आविष्कार आहेत.  

                        वयाच्या 35 व्या वर्षी जेन याने काहीतरी वेगळे करायचे म्हणून  व्हाट्सएप सुरू केले.ज्या फेसबुक कंपनीने जेनला त्यांच्या कंपनीत काम देण्यास नकार दिला त्याच फेसबुक ने 19 बिलियन म्हणजेच एक लाख तेवीस हजार कोटीला व्हाट्सएप विकत घेतले.जिद्द ही अशी असावी.जेन फेसबुक मध्ये कामाला लागला असता तर कदाचित व्हाट्सएप निर्माण झालेही नसते.सिक्युरिटी गार्ड म्हणून नोकरी करणारा जेन,परिस्थितीमुळे सरकारी खानवळीत लाईन मध्ये उभे राहून जेवण घेणारा जेन,शिक्षण संपल्यावर जुनी पुस्तके विकून खर्च भागवणारा जेन यांचे आयुष्य पाहिले की सहज मनात विचार येतो परिस्थिती सर्वांवर वाईट वेळ कधी न कधी आणत असते.फक्त आपण त्यापुढे किती खचतो किंवा धैर्याने उभे राहतो यावर आपले जगणे आणि जिंकणे अवलंबून असते.

💐💐💐💐💐💐💐💐💐💐💐💐💐

                                       😊 संकलन 😊

                                       श्री. भरत पाटील.

😊 प्रेरणादायी व्यक्तिमत्त्व : मार्क झुकरबर्ग 😊

 💐 फेसबुकचा जनक,जगातील सर्वात तरुण अब्जाधीश : मार्क झुकरबर्ग 💐

          

              अमेरिका देशातील न्यूयॉर्क येथील व्हाईट प्लेन्स येथे14 मे 1984 मध्ये त्याचा जन्म झाला.त्याचे वडील एडवर्ड डेंटिस्ट तर आई कॅरेन मानसोपचार तज्ज्ञ.त्याला लहानपणापासून संगणकाची प्रचंड आवड होती.त्याची आवड पाहून वडिलांनी त्याच्यासाठी संगणक शिक्षक नेमला.त्याचे काही प्रश्न संगणक शिक्षकालाही कठीण जात.संगणक प्रोग्रामिंग तो सहज बनवत असे.अगदी लहान वयात ZUCK NET मेसेंजर त्याने बनवले.पुढे तो मुला मुलींचे फोटो एकत्र करून कोणता चेहरा सुंदर आहे यासाठी FACE MASH वेबसाईट बनवतो,ती लोकप्रिय झाल्यावर आपल्या काही मित्रांना बरोबर घेऊन तो हॉवर्ड युनिव्हर्सिटी च्या हॉस्टेल च्या खोलीतून एका अद्भुत  सोशल साईडची निर्मिती करतो जी पुढे वर्षानुवर्षे न भेटलेल्या अब्जावधी लोकांना एकत्र आणते ती सोशल साईड म्हणजे Facebook.आणि ते बनवणारा तो मुलगा म्हणजे मार्क झुकरबर्ग.   

              जगातील सर्वात तरुण अब्जाधीस असणारे झुकरबर्ग यांना पर्सन ऑफ द इयर,जगातील 100 श्रीमंत  व्यक्तीत स्थान,जगातील शक्तिशाली लोकांत 10 वा क्रमांक,हॉवर्ड कडून मानद पदवी.यासारखे अनेक मान सन्मान मिळाले.फेसबुक साठी मध्येच शिक्षण सोडणारे मार्क हे हॉवर्ड युनिव्हर्सिटीच्या कॉलेज मध्ये शिकत असताना तेथे मुला मुलींचे  परिचय देणारे ,फोटो असणारे फेसबुक नावाचे  पुस्तक होते यावरून  त्यांना फेसबुक ची कल्पना सुचली.प्रथम ते काही कॉलेज पुरते मर्यादित होते.पण यातून अनेक लोक जोडले जावे.जुने मित्र मिळावे,वैचारिक देवाणघेवाण व्हावी म्हणून मार्क यांनी फेसबुक सार्वजनिक केले.आज दोन अब्जच्या आसपास यूजर फेसबुकचे  आहेत.     

             सुरुवातीला मार्क यांचे कमी वय,तज्ञांचा अविश्वास, यामुळे प्रथम त्यांच्या फेसबुक कडे दुर्लक्ष केले गेले,पण ते खचले नाही.पुढे फेसबुक ने व्हाट्स अँप, इन्स्टाग्राम चे  आपल्याकडे विलीनीकरण करून बाजारात तगडा प्रतिस्पर्धी निर्माण होऊ दिला नाही. करडा टी शर्ट आणि निळी ब्लु जीन्स पॅन्ट कायम परिधान करणारे अब्जाधीश मार्क म्हणतात'मी एकाच रंगाचे पोशाख कायम परिधान करतो कारण मला कपडे कोणते घालायचे हा प्रश्न पडत नाही आणि काम करताना तितका वेळही नाही'.त्यांनी आपल्या मुलीच्या जन्मावेळी साडेचार हजार कोटी डॉलर सामाजिक कार्यसाठी दान केले आहे.फेसबुक चे मुख्यकार्यकारी अधिकारी असणारे मार्क व्यवसायाचे सोपे गणित सांगतात ते असे कोणताही धोका न घेणे हा  सर्वात मोठा धोका आहे.खरोखर वेगाने बदलत असलेल्या या जगात अपयशी ठरण्याची एकमेव रणनीती म्हणजे धोका न घेणे.मार्क यांच्या आयुष्याकडे पहाताना लहान वयातही तुमची वेगळी कल्पना तुम्हाला खुप मोठे करते आणि अविस्मरणीय यश मिळवून देते हाच धडा मिळतो.

💐💐💐💐💐💐💐💐💐💐💐💐💐

                                        😊 संकलन 😊

                                       श्री.भरत पाटील.

😊 प्रेरणादायी व्यक्तिमत्त्व : मायकेल फॅरेडे 😊

 💐 विद्युत जनित्राचे संशोधक, महान वैज्ञानिक: मायकेल फॅरेडे 💐

          

 

             इंग्लंड देशातील न्यूइंग्टन सरी येथे त्याचा जन्म 22 सप्टेंबर 1791 मध्ये झाला.लोहराचे काम करणारे वडील जेम्स यांची परिस्थिती अत्यंत हलाखीची होती.त्यामुळे त्याला शिक्षण मिळणे तसे दुरापास्तच होते.वयाच्या 14 व्या वर्षी प्राथमिक वाचन लेखन तो कसेबसे शिकला. कधी कधी फक्त ब्रेड खाऊन दिवस काढावे लागत असे.इतक्या लहान वयात तो एका प्रेस मध्ये पुस्तके बायडिंग करण्याच्या नोकरीला लागला. तेथे दिवसभर काम करून तो रात्री पुस्तके वाचत असे.येथेच अनेक विज्ञान पुस्तके त्याच्या वाचनात आली. पुढे त्याला हॅप्रि  डेव्हि हे शास्त्रज्ञ गुरू मिळाले.रॉयल सोसायटी कॉलेज मध्ये त्याचे शिक्षण पुनश्च हरिओम म्हणत सुरू झाले.मग त्याने विजेच्या संदर्भात असे काही शोध लावले की त्याला विजेच्या शोधाचे 'पितामह 'म्हटले जाते.तो मुलगा म्हणजे महान शास्त्रज्ञ मायकेल फॅरेडे.               

                मायकेल यांनी मोटार,इलेक्ट्रिकल जनरेटर, बेझॉल रसायनाचा शोध,कार्बन क्लोरीन संयुगे,हायड्रोजन क्लोराईड, हायड्रोजन सल्फाईड,कार्बन डाय ऑक्साईड यांचे द्रवीकरण यासारखे अनेक शोध लावले.एखादी विद्युत प्रवाह वाहून नेणारी वायर जी चुंबकीय बलाच्या मदतीने विद्युतीय बलाची निर्मिती एका मॅकॅनिकल बलात करते याच तत्वातून मायकल यांनी मोटारचा शोध लावला.आणि आपल्या दैनंदिन वापरातील फॅन,मिक्सर,पाणी पंप, कार अशा कोट्यवधी वस्तूत मोटार वापरली जाऊ लागली.ही क्रांती अवघ्या जगात उलथापालथ करणारी ठरली.मायकेल यांचे विद्युत चलीत्राचे तत्व वापरून आज जगभरात वीज निर्माण केली जाते.                                           

              100 पेक्षा अधिक पुरस्कार मिळालेल्या मायकेल' यांना रॉयल सोसायटी 'चे फेलो म्हणून सन्मान मिळाला.संशोधन क्षेत्रातील अत्यंत मानाची रॉयल,रमफर्ड,कॉप्लि ही पदके त्यांना मिळाली.'नॅचरल फिलॉसॉफर' ऐवजी 'सायंटिस्ट' हा शब्द त्यांनी शोधून काढला.शेक्सपिअर,न्यूटन,यानंतर इंग्लंड मधील 20 पौंड नोटेवर फोटो असणारे एकमेव शास्त्रज्ञ म्हणजे मायकेल फॅरेडे.कोठेही उच्च शिक्षण न घेतलेल्या,घरी प्रचंड गरिबी असलेल्या मायकेल यांनी इतके महत्वाचे शोध लावले ते त्यांच्याकडे असलेल्या चिकाटीमुळे.आपलेही आयुष्य असेच आहे आपल्या मनाला फक्त  एकच सांगायचे तुला एका निश्चित ठिकाणी जाऊन थांबायचे आहे.मगच विसावा घ्यायचा आहे तोपर्यंत प्रयत्न करणे सोडायचे नाही.

💐💐💐💐💐💐💐💐💐💐💐💐💐

                                         😊 संकलन 😊

                                         श्री. भरत पाटील.

😊 प्रेरणादायी व्यक्तिमत्त्व : डॉ तात्याराव लहाने 😊

 💐 सामाजिक भान जपणारे,दीड लाखाहून अधिक डोळ्यांवरील यशस्वी शस्त्रक्रिया करणारे महान नेत्रचिकित्सक : डॉ. तात्याराव पुंडलिक लहाने.

         

              महाराष्ट्र राज्यातील लातूर जिल्ह्यातील माकेगाव  येथे त्याचा जन्म 12फेब्रुवारी 1957 मध्ये झाला.आई अंजनाबाई तर वडील पुंडलिक  .हे शेतकरी कुटूंब. त्याच्यासह घरात दोन भाऊ,चार बहिणी अशी एकूण सात भावंडे.घरात प्रचंड गरिबी असली तरी आपला मुलगा इतर मुलांसारखा शिकून मोठा झाला पाहिजे ही आईची तीव्र इच्छा होती.तो मुलगा शाळेत जातो शिक्षण घेता घेता गुरे सांभाळणे,पेरणी,खुरपणी,साळ बडवणे,अशी कामे करतो.वडिलोपार्जित जमीन गहाण ठेवून,कमवा शिका योजनेत काम करून शिक्षण पूर्ण करतो इतक्या कठीण परिस्थितीतही बोर्डाच्या परीक्षेत दहावा येतो.पुढे तो मुलगा MBBS डॉक्टर बनतो.त्याच्या दोनीही किडन्या निकामी झाल्यावर आईने दिलेल्या एका किडणीवर जगताना पुढील सारे समाजासाठी देण्याची शपथ घेतो. ते कार्य तो इतके नेटाने करतो की दीड लाख लोकांच्या डोळ्यावर तो यशस्वी बिनटाका शस्रक्रिया करतो.पुढे तो मुलगा महाराष्ट्र राज्याच्या आरोग्य विभागाचा संचालक बनतो.तो मुलगा म्हणजे महान नेत्र तज्ज्ञ डॉक्टर तात्याराव पुंडलिक लहाने.                          

                 तात्याराव यांनी केलेल्या या सामाजिक कार्याची दखल घेत त्यांना पदमश्री,छत्रपती शाहू महाराज, महात्मा फुले,आचार्य अत्रे जीवन गौरव, यासारखे अनेक पुरस्कार मिळाले.बीड,धुळे,जे.जे हॉस्पिटलमध्ये आपली उच्च दर्जाची वैद्यकीय सेवा देणारे डॉक्टर 18 ते 23 तास काम करत.जे जे हॉस्पिटलचा चेहरा मोहरा बदलण्यात डॉक्टरांचा वाटा मोठा आहे.जगात सर्वाधिक 1700 पेक्षा अधिक कुष्ठरोग्यांच्या डोळ्यांची यशस्वी शास्रक्रिया  करणारे तात्याराव कोरोना काळात आयुष टास्क फोर्स,पेडियाट्रिक टास्क फोर्स चे सदस्य आहेत.यात कोरोना उपचारासाठी मार्गदर्शक सूचना देण्यात त्यांची भूमिका मोलाची ठरली आहे.                                 

             160 टाक्यांची जखम स्वतःच्या शरीराला देऊन माझा तात्या जगला पाहिजे म्हणून आपली किडनी देणारी माऊली तात्यांना मिळाली.म्हणून डॉ. तात्या लहाने इतके मोठे काम उभे करू शकले.ज्या भागात सरकारी यंत्रणा याआधी गेली नव्हती तेथील दुर्गम भागात विविध शिबिरे घेऊन त्यांनी लाखो लोकांच्या डोळ्यात प्रकाश दिला.जणू लाखो कुटूंबेच उभी केली.कमवा शिका योजनेतून रोज 50 घागरी झाडांना पाणी घालणारे तात्या,स्वतः मेस चालवून शिक्षणाचा खर्च भागवणारे तात्या,कित्येक दिवस एकच शाळेचा ड्रेस वापरणारे तात्या आताच्या पिढीसाठी आदर्श आहेत.ते यासाठी की कितीही कठिण काळ असला तरी संघर्षाची शस्रे कधीच म्यान करू नका.निर्णायक  क्षणापर्यंत लढत राहणे हेच वीरांचे लक्षण असते.हेच डॉ. लहाने नी केले म्हणूनच ते खरेखुरे हिरो आहेत.

💐💐💐💐💐💐💐💐💐💐💐💐💐

                                       😊 संकलन 😊

                                       श्री.भरत पाटील.