💐 प्रथम पुण्यस्मरण : सन्मा.जितेंद्रजी गोस्वामीसाहेब 💐

 😢💐  प्रथम पुण्यस्मरण (दि-6मे,2021)💐😢

🌺निष्काम कर्मयोगी : जितेंद्रजी गोस्वामी साहेब 🌺

 स्वप्ननगरी मुंबईतील चुनाभट्टीसारख्या कामगार वस्तीत गोरगरीब व कष्टकऱ्यांच्या मुलाबाळांच्या शिक्षणाची आबाळ होऊ नये; त्यांना दर्जेदार शिक्षण मिळावे,या उदात्त हेतूने गावदेवी मुक्तादेवीच्या कुशीत ज्ञानमंदिर उभारणारा शिक्षणमहर्षी म्हणजे श्री. जितेंद्र गोस्वामीसाहेब.

            संपूर्ण पूर्व उपनगरांत शिक्षणक्षेत्रात अतिशय सन्मानाने नाव घेतल्या जाणाऱ्या एम एस के पूर्व प्राथमिक, प्राथमिक विद्यालय (सर्वोत्कृष्ट शाळा पुरस्कार)व एल के हायस्कूल या शिक्षण संकुलाचे ते संस्थापक / शिल्पकार होते. त्यांच्या अथक परिश्रमाने व मार्गदर्शनाने शिष्यवृत्ती परीक्षांसह विविध स्पर्धापरीक्षांमध्ये शाळेने उत्तमोत्तम यश संपादन केले आहे.एस एस सी ची दरवर्षी 100 % निकालाची उज्ज्वल परंपरा कायम आहे.घोटी-इगतपुरी या ठिकाणी मागास,भटक्या जाती व जमातीच्या मुलांसाठी'संजीवनी आश्रमशाळा' ही निवासी वस्तीशाळा त्यांनी सुरू करून त्यातही इ 1 ली ते 10 वी च्या शेकडो मुलांना दर्जेदार शिक्षण मिळू लागले. त्यानंतर इगतपुरी येथे वृध्दाश्रमाची स्थापना करून, त्यात वयोवृद्ध किंवा एकाकी जीवन जगणाऱ्यांसाठी ' आयुष्याची दुसरी खेळी' तयार करून त्यांच्या जीवनात रंग भरण्याचा त्यांचा मानस होता.

               महाराष्ट्र शासनातर्फे दिला जाणारा,दलितमित्र, समाजभूषण अशा विविध पुरस्कारांनी सन्मा गोस्वामी साहेबांना गौरविण्यात आले होते.मुंबई विद्यापीठात सन्मा. राज्यपाल यांच्या द्वारे नियुक्त सिनेट सदस्य म्हणून ही त्यांनी कार्य केले होते.

        😊 आनंदमुर्ती गोस्वामीसाहेब  😊

               आदरणीय जितेंद्र गोस्वामीसाहेब म्हणजे प्रत्यक्ष आनंदमुर्ती होते. शाळेच्या प्रांगणात, व्हरांड्यातला त्यांचा एक राऊंड सुद्धा विद्यार्थ्यांमध्ये आणि शिक्षकांमध्ये चैतन्य निर्माण करणारा असायचा.सहज कोणत्याही वर्गात जाऊन मुलांत मूल होऊन त्यांच्याशी दिलखुलास गप्पा मारायच्या,त्याच्यासोबत आपल्या बालपणाच्या आठवणींना उजाळा द्यायचा आणि बघता बघता सारी मुले त्याच्यासोबत रमून जात .अभ्यासातील ताणतणाव सहज कसा दूर करायचा ,हसत खेळत आनंददायी शिक्षण कसे असावे याची चालती बोलती कार्यशाळा म्हणजे गोस्वामी साहेब.

     😊 गोस्वामीसाहेब म्हणजे एक व्यासंगी व्यक्तिमत्त्व 😊

       दररोज सकाळी 7 ते 8 वर्तमान पत्रांचा समाचार घेत आपले ज्ञान अद्ययावत ठेवण्याची त्यांची सवय ही अंगवळणी पडली होती. त्यानंतर आपल्या मित्रमंडळी सोबतचा सकाळचा फेरफटका / जॉगिंग यांत कधी खंड पडला नाही. पुस्तक वाचनची भारी आवड साहेबांना होती. वर्तमानपत्रातल्या महत्त्वाच्या बातम्यांची कात्रणं ठेवणं, ताबडतोब पत्रव्यवहार करून संबंधित लोकांना त्यांच्या कामाची पावती / प्रतिक्रिया देणं हा त्यांचा आवडता कार्यक्रम होता. आपल्याला कदाचित ते तितकंसं महत्वाचे वाटत नसले; तरी माणसं अशाने जोडली जातात,असं ते नेहमी म्हणायचे ! स्वतः ची अमृतसष्टी साजरी करतांना ही त्यांनी ग्रंथाची तुलादान करून स्वतः च्या वजनाइतकी पुस्तके मुलांना वाचनासाठी दान केली. यापेक्षा अधिक व्यासंग काय असतो ?

        

         😊 शाळेला आपले तिसरे अपत्य मानणारा पितृहुदयी गोस्वामीसाहेब 😊

              हाडाच्या शिक्षिका प्रणिता मॅडम व डॉ प्राजक्ता मॅडम अशी दोन कन्यारत्न असतांना शाळा हे आपलं तिसरे अपत्य गोस्वामी साहेबांनी मानले व ते आयुष्यभर जोपासले. कार्यक्रम कुठलाही असो,साहेब कार्यक्रमाला नेहमीच हजर. कार्यक्रमाला उपस्थित राहिल्यावरही मुलांशी सहजपणे संवाद साधण्याची जबरदस्त कला साहेबांना अवगत होती.

              कदाचित आपण बोलायचे थांबलात आणि  मुले,शिक्षक आणि शाळा यांच्यातला संवाद कमी झाला. कोरोना तर निमित्त होते साहेब, ही शाळा शिक्षक आणि शाळेचा आत्मा म्हणजे विद्यार्थी सारे तुमची  खूप खूप आठवण काढतात.

          आदरणीय गोस्वामीसाहेब, आपण प्रत्यक्ष जरी या शिक्षण वास्तूंमध्ये नसलात ; तरी आपले आशीर्वाद सदैव आमच्यासाठी प्रेरणादायी असतील.परमेश्वर आपणांस चिरशांती देवो, हीच प्रार्थना !

         💐आपल्या कृपाशीर्वादास इच्छूक 💐

मा. श्रीम. प्रमिला गोस्वामीमॅडम (संचालिका)

मा.श्रीम. प्रणिता भारती गोस्वामी(कोषाध्यक्षा)

मा. डॉ. श्रीम.प्राजक्ता गिरी गोस्वामी.

मुख्याध्यापक, शिक्षक व शिक्षकेतर कर्मचारी.(म.भ.वि. जा.शिक्षण प्रसारक मंडळ.,प्राजक्ता को ऑप क्रेडिट सोसायटी.)

                                               💐💐 शब्दांकन 💐💐

                                                     श्री. भरत पाटील.

                                         (एम एस के प्राथमिक विद्यालय.)