😊 प्रेरणादायी व्यक्तिमत्त्व : दिलीपकुमार 😊

 💐 अभिनयाचा बादशहा, ट्रेजेडी किंग,पदमविभूषण : दिलीपकुमार 💐

        

              आताच्या पाकिस्तान देशातील पेशावर उत्तर मध्ये त्याचा जन्म 11 डिसेंबर 1922 मध्ये झाला.वडील लाला गुलाम सरवार हे फळांचा धंदा करत होते.पुढे देशाची फाळणी झाली आणि तो वडिलांबरोबर मुंबई या मायनगरीत आला.वडिलांबरोबर फळे विकायचा व्यवसाय करतो.या व्यवसायात तोटा सहन करावा लागतो.पुणे येथे कॅन्टीन मध्ये काम करत असताना देविका राणी त्याला पाहतात.त्याच्यातील अभिनेत्याचे गुण ओळखतात.त्याला चित्रपटात काम करण्याची संधी मिळते.मग  मात्र तो मुलगा वळून पहात नाही.सुमारे 5 दशके तो भारतीय चित्रपट सृष्टीवर अधिराज्य गाजवतो तो महान कलाकार म्हणजे मुहम्मद युसूफ खान ऊर्फ दिलीपकुमार.         

                 दिलीपकुमार यांच्या अभिनयाने फक्त भारतातच नाही तर परदेशातही भुरळ घातली.त्यांच्या या अभिनयाचा सन्मान म्हणून त्यांना पदमभूषण,पदमविभूषण,यासारखे पुरस्कार मिळाले.भारतीय चित्रपट सृष्टीतील सर्वात मानाचा समजला जाणारा दादासाहेब फाळके पुरस्कार देऊन दिलीपकुमार यांना गौरविण्यात आले आहे.शोकांतिका किंवा शोकांतिक भूमिकांमुळे त्यांना ट्रॅजेडी किंग म्हणून ओळखले जाते.                                        

            1944 साली ज्वार भाटा हा त्यांचा पहिला चित्रपट पुढे ,आन,अमर,अंदाज, दाग,देवदास,फुटपाथ,सौदागर, मुगल ए आझम,शक्ती,मशाल,क्रांती,यांसारख्या चित्रपटातून त्यांची जादू कायम राहिली.आपल्या पाच दशकाहूनही अधिक चित्रपट  काळात त्यांचे 65 हून अधिक चित्रपट प्रदर्शित झाले.सर्वोत्कृष्ट अभिनेत्याचा 8 वेळा पुरस्कार मिळवणारे दिलीपकुमार यांनी फळे विकून,कॅन्टीन मध्ये काम करून ,जीवनातील संघर्ष चालू ठेवला. पण ते हरले नाही ,किंवा मागे हटले नाही.त्यांच्या जीवनाकडे पहाताना हेच शिकायचे की परिस्थिती आपल्या  अपार मेहनतीने आपल्या समोर गुडघे टेकवून उभी राहते.अशावेळी तुम्ही केलेल्या अतितीव्र संघर्षाचे चीज झालेले असते.

💐💐💐💐💐💐💐💐💐💐💐💐💐

                                       😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : विल्यम शेक्सपिअर 😊

 💐 इंग्रजी साहित्याचा जनक,जगप्रसिद्ध नाटककार व कवी : विल्यम शेक्सपिअर 💐

              

             इंग्लड देशातील वार्वीकशायर मधील स्ट्रटफोर्ड अपॉंन अँव्हन येथे त्याचा जन्म 26  एप्रिल 1564 मध्ये झाला.त्याचे वडील जॉन व्यापारी तर आई मेरी गृहिणी होती.वयाच्या सातव्या वर्षी त्याची शाळा सुरू होते.त्या काळी लॅटिन ही प्रमुख भाषा शिकणे गरजेचे असले तरी तो इंग्रजी फ्रेंच,इटालियन या भाषावर उत्तम  प्रभुत्व मिळवतो.वयाच्या 13 व्या वर्षी त्याच्या वडिलांचे निधन होते. इतक्या लहानपणी त्याच्यावर कुटुंबाची व्यवसायाची जबाबदारी येते आणि त्याचे शिक्षण बंद होते.त्याला लहानपणी असणारी नाटकाची आवड जोपासता यावी म्हणून तो गाव सोडून शहरात येतो.तेथे नाटकाचे बारकावे शिकतो.त्यात तो इतकी अच्युत्य दर्जाची नाटके लिहतो की ती नाटके अजरामर होतात हे लेखन करणारा तो मुलगा म्हणजे महान नाटककार म्हणजे शेक्सपिअर उर्फ फादर ऑफ ड्रामा.          

            शेक्सपिअर यांची नाटके,काव्ये अजरामर झाली तर शोकांतिका प्रचंड गाजल्या.त्याचा मराठी साहित्यावरही प्रभाव पडला. काव्य प्रकारात सुनीत तर कल्पनारम्य, शोकांतिका, ऐतिहासिक नाटके हे त्यांच्या नाटकाचे मुख्य वैशिष्ट्ये होते.जगातील सर्व भाषांत त्यांचे साहित्य अनुवादित झाले यावरून त्यांच्या लेखणीची ताकद समजते. अ लहर्स कॅम्पप्लेट,द पॅशनेट प्लिग्रीम,ही काव्ये,रोमिओ अँड ज्युलिएट ही कोवळ्या प्रेमाची कहाणी,ज्युलिएअ सीझर,या शोकांतिका, हॅम्लेट,किंग लिअर,मॅकबेथ,ही  नाटके अशा साहित्य कृती त्यांच्या प्रचंड गाजल्या.मराठी भाषेतील किंग लिअर वर अनुवादित झालेली *नटसम्राट* ही शोकांतिका अफाट लोकप्रिय झाली.                                                       आपल्याच माणसांकडून विश्वासघात,दगाफटका,कपट कारस्थाने, सूड,मत्सर, व्यभिचार, राक्षसी वृत्ती,प्रचंड महत्वकांक्षा यांचे विक्राळ दर्शन त्यांच्या नाटकातून जसे घडले तसे मानवी मूल्ये,नियती,ईश्वरी न्याय, मृत्यूचे चिंतन यांचेही दर्शन घडले.चार शतके होत आली तरी शेक्सपिअर तितकाच आजही लोकप्रिय आहे.स्वतःतील उत्तमाचा शोध त्याने घेतला,त्यासाठी एकाग्र राहिला,त्याला काय करायचे आहे हे त्याला पक्के माहीत होते म्हणून तो नाटककार, कवी म्हणून एक दीपस्तंभ बनून राहिला.

💐💐💐💐💐💐💐💐💐💐💐💐💐

                                       😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : कर्नल हरलैड डेव्हिड सैंडर्स 😊

 💐 KFC या आंतरराष्ट्रीय खाद्यपदार्थ कंपनीचे संस्थापक ,प्रचंड मेहनती व जिद्दी : कर्नल हरलैड डेव्हिड सैंडर्स 💐

                 

              अमेरिकेतील हेनरीविलले इंडियाना येथे त्याचा जन्म16 डिसेंबर 1880 मध्ये झाला.वयाच्या पाचव्या वर्षी त्याचे वडिलांचे छत्र हरपते.तो सैरभैर होतो.अकाली जबाबदारीचे ओझे  त्याच्यावर येते.सातव्या वर्षी तो काही स्वयंपाक करायला शिकतो.17 व्या वर्षी हातातील 4 नोकऱ्या जातात.सेल्समन, टायर विकणे,फेरी बोट चालवणे, रेल्वेच्या वाफेच्या इंजिनवर काम करणे अशी कामे तो  उपजीविकेचे साधन म्हणून करू लागतो.अगदी वयाच्या 40 व्या वर्षी कुकिंग चे काम करतो.पुढे वय वाढत जाते हातपाय थकतात.तो उपजीविकेसाठी धपडत असतो. पण त्याचे मन तरुण असते.त्याला उत्तम चिकन बनवता येत असते.मग त्याच्या मनात विचार चमकतो  तेच चिकन आपण लोकांना विकू शकतो. आणि वयाच्या 63 व्या वर्षी तो स्वतःचे रोडसाइड हॉटेल केंटकी शहरात चालू करतो.त्याच्या चिकनच्या चवीवर लोक फिदा होता.मग तो मागे वळून पहात नाही.त्या हॉटेलच्या जगाच्या 136 देशात 22,621 शाखा होतात.ते प्रसिद्ध हॉटेल म्हणजे Kentacky Fried Chicken म्हणजेच KFC.आणि हे सगळे यश मिळवणारा तो मुलगा म्हणजे कर्नल हरलैड डेव्हिड सैंडर्स.                                 चिकन रेसिपीवर सारखे प्रयोग करून कर्नल यांनी स्वतःची एक वेगळी चविष्ट रेसिपी तयार केली.ती घेऊन त्यांनी अनेक गल्ल्या ,हॉटेल पालथी घातली.माझे चिकन चाखून पहा पण सगळीकडे नकार मिळाला.इतके नकार पचवून ते थकले नाही One More Time म्हणत लढत राहिले.शेवटी यश मिळाले पहिला होकार आला. हरमन या हॉटेल व्यसायिकाने त्यांना संधी दिली आणि KFC चिकन चे साम्राज्य उभे राहिले.                                                     आपल्या KFC कंपनीची प्रचंड  लोकप्रियता पाहून त्यांनी तिचे फ्रंचायशी हक्क त्यांनी 2 मिलीयन डॉलर ला विकले.पण शेवटपर्यंत फाउंडर  मेंबर तेच राहतील असा करार झाला.पिझ्झा हट,टॅको बेल,विंग स्ट्रीट, ह्यांची KFC बरोबर भागीदारी आहे.मॅक्डोनाल्ड नंतर जगात दुसऱ्या क्रमांकाची रेस्टॉरंट साखळी KFC ची आहे.कर्नल यांना माझे चिकन जगात सर्वोत्तम आहे हे आणि ते लोकांना खायला घालायचे आहे हा ध्यास होता.तरुण वयात व्यवसायात रिस्क घ्यायला भलेभले लोक तयार होत नाही पण वयाची 62 वर्ष लोटली असताना व्यवसाय सुरू करून इतका यशस्वी करणे साधी गोष्ट नाही.कर्नल यांच्या जीवनाकडे पाहताना हाच संदेश मिळतो की तुम्हाला मोठे होण्यासाठी तुमचे वय आडवे येत नाही.तुमच्यातील सर्वोत्तम काय आहे याचा शोध तुम्हाला एकदा लागला की यश तुमच्या मागे येतेच येते.

💐💐💐💐💐💐💐💐💐💐💐💐💐

                                      😊 संकलन 😊

                                         श्री भरत पाटील.

😊 प्रेरणादायी व्यक्तिमत्त्व : टेसी थॉमस 😊

 💐 भारताची प्रथम मिसाईल वुमन ,महान वैज्ञानिक : टेसी थॉमस 💐

         

             केरळ राज्यातील अलाप्पूझा येथे तिचा जन्म1964 साली झाला.वडील आय.एफ.एस अधिकारी तर आई शिक्षिका.ती थुंबा रॉकेट व मिसाईल लाँचिंग स्टेशनजवळ मोठी होते.यातून तिला लहानपणीच रॉकेट चे आकर्षण असते. घरात सगळे कसे आनंदी वातावरण पण एक दिवस तिच्या वडिलांना पक्षघाताचा झटका येतो सगळे कसे कोलमडून पडते.तिची आई जिद्दीने उभी राहते.हिच्यासह बरोबरीच्या चारही बहिणींना चांगले शिक्षण देते. तिला लहानपणापासून गणित व भौतिकशास्त्र हे विषय प्रचंड आवडत असे.ती मुळातच हुशार असते स्टेट बँक ऑफ इंडिया कडून दरमहा 100 रुपये कर्ज घेऊन ती बी.टेक एम टेक,डिफेन्स ऍडव्हान्स टेकनोलॉजी सारखे उच्च शिक्षण घेते.मग भारताच्या संरक्षण संशोधन व विकास संस्थेत(DRDO )देशसेवा करताना स्वतःच्या कामाचा असा काही अत्युच्य बिंदू गाठते की ती मुलगी भारताची पहिली मिसाईल वूमन म्हणून ओळखली जाते.ती मुलगी म्हणजे महान भारतीय शास्त्रज्ञ टेसी थॉमस.                       

            टेसी यांनी भारतीय विज्ञान व संशोधन क्षेत्रात जे अनमोल संशोधन केले त्याचा गौरव म्हणून त्यांचा लाल बहाद्दूर शास्त्री नेशन अवार्ड,कल्पना चावला,सुमन शर्मा,मिसाईल वैज्ञानिक, इंडियन ऑफ द इयर,वूमन ऑफ द ईअर  यासारखे अनेक पुरस्कार प्रदान करण्यात आले आहे.पंतप्रधान डॉ.मनमोहन सिंग यांनी  'भारतीय वैज्ञानिक रत्न'ही उपाधी त्यांना दिली आहे.                                            अग्नी3,अग्नी4,त्रिशूल,नाग,अग्नी,ब्रम्होस,या मिसाईल निर्मितीत डॉ. अब्दुल कलाम यांच्या बरोबर मोठे संशोधन केले.अग्नी 5  मिसाईलच्या पहिल्या भारतीय महिला संचालक म्हणून संपूर्ण जबाबदारी त्यांनी पार पाडली. 5000 किमीची मारा करण्याची क्षमता असणारे मिसाईल त्यांनी तयार केले.तेव्हापासून त्यांना भारताच्या मिसाईल वूमन म्हटले जाऊ लागले.महिंद्रा ग्रुप चे चेअरमन आनंद महिंद्रा टेसी यांच्या बद्दल असे म्हणतात 'की कोणत्याही भारतीय अभिनेत्री पेक्षा टेसी या अधिक प्रसिद्ध हव्या होत्या.शिवाय  देशातील प्रत्येक शाळेत त्यांचा फोटो हवा यातून हजारो मुलींना प्रेरणा मिळेल.टेसी थॉमस यांनी आपल्या अलौकिक बुद्धिमतेच्या,मेहनतीच्या चिकाटी, व प्रतिभेच्या जोरावर भारत देशासाठी इतके मोठे काम उभे केले त्यांचे जीवन आपल्याला पदोपदी हेच सांगत राहते की आपल्याकडे  असलेल्या बुद्धिमत्तेचा उपयोग दुसऱ्याच्या हितासाठी करा,यातून मिळणारा आंनद व सुख चिरकाल मनशांती देणारे असते.

💐💐💐💐💐💐💐💐💐💐💐💐💐

                                      😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : आनंद महिंद्रा 😊

 💐 देशभर 'महिंद्रा अँड महिंद्रा चे साम्राज्य उभारणारा जिद्दी व संवेदनशील उद्योगपती : आनंद महिंद्रा.💐

            महाराष्ट्र राज्यातील मुंबई सारख्या माया नगरीत त्याचा जन्म 1 मे 1955 मध्ये उद्योगपती कुटुंबात  झाला.वडील हरिष तर आई इंदिरा यांचे त्याच्या शिक्षणाकडे जातीने लक्ष होते.तो हॉवर्ड विद्यापीठात पदवी घेतो तर पुढे एम.बी.ए चे शिक्षण पूर्ण करतो.तो मुलगा मग भारतात येतो.स्वतःच्या वडिलोपार्जित व्यवसायात कार्यकारी सहाय्यक बनतो. आपल्या स्वतःच्या वेगळ्या कार्यशैलीने तो त्या व्यवसायाचा प्रमुख बनतो.मग प्रचंड झेप घेत ती कंपनी 15 हजार अरब डॉलर मूल्य असणारी कंपनी बनते.त्यात सोळा हजार पेक्षा अधिक कामगार काम करू लागतात.ती कंपनी म्हणजे महिंद्रा अँड महिंद्रा लिमिटेड आणि हे कंपनी साम्राज्य उभा करणारा तो मुलगा म्हणजे द ग्रेट पर्सन आनंद हरिष महिंद्रा.   

            पंजाब मधील लुधियाना येथून एक स्टील कंपनी म्हणून जगदीश चंद्र महिंद्रा यांनी सुरू केलेल्या कंपनीचे इतके मोठे जाळे तयार झाले ते आनंद महिंद्रा यांच्या कल्पक बुद्धिमत्तेमुळे. आनंद यांच्या सामाजिक व औद्योगिक  कार्याचा गौरव म्हणून त्यांना पदमविभूषण,फ्रान्सचा ऑर्डर ऑफ मेरिट,राजीव गांधी पुरस्कार,अमेरिकेतील इंडिया फाउंडेशन कडून पर्सन ऑफ इयर व लीडरशीप अवार्ड,आशिया बिझनेस लीडर,इकॉनॉमीक टाईम्स अवार्ड यासारखे अनेक सन्मान मिळाले.जपान क्वालिटी मेडल,डेमिंग अवार्ड जिंकणारी जगातील एकमेव कंपनी म्हणजे महिंद्रा.महिंद्रा ट्रॅक्टर,बोलेरो, कमांडर,मॅक्स,स्कॉर्पिओ, जायलो, रेनॉल्ड लोगान,SUV300,XUV500 ही गाड्यामधील महिंद्रा ची उत्पादने प्रचंड लोकप्रिय झाली.कोटक महिंद्रा बँक,महिंद्रा डिफेन्स, टू व्हीलर लिमिटेड, एज्युकेशन, फायनान्स,या सारख्या अनेक क्षेत्रात महिंद्रा कंपनी यशस्वी ठरली आहे. 

           कार्यक्षम व्यवस्थापन आणि नेतृत्वात जागतिक उद्दिष्टे व यश मिळवण्यासाठी काही निश्चित निकष पूर्ण करणारी महिंद्रा ही मोजक्या कंपन्यांपैकी एक कंपनी आहे.भारतातील अनेक मुली शिकाव्यात,त्यांचे अर्धवट शिक्षण सुटू नये म्हणून आनंद महिंद्रा यांनी नन्ही कली 'नावाने सुरू केलेला उपक्रम NGO आज लाखो मुलींच्या शिक्षणाला दिशा देत आहे.भारतीय लोकांच्या अनेक प्रश्नांशी समरस झालेले महिंद्रा प्रचंड संवेदनशील आहेत.महिंद्रा यांनी आपल्या क्षेत्रात इतके उत्तुंग यश मिळवले तरी या माणसाची संवेदनशीलता आपत्ती काळात पदोपदी जाणवते.आनंद महिंद्रा यांच्या आयुष्याकडून आपल्याला हा धडा मिळतो की तुमच्या पूर्वजांनी तुमच्यासाठी जे वैभव उभे केलेले  आहे ते तुम्हाला टिकवता आले पाहिजे त्यात भर घालता आली पाहिजे.तरच तुम्ही पूर्वजांच्या पुण्याईचे हकदार बनता.

💐💐💐💐💐💐💐💐💐💐💐💐💐

                                      😊 संकलन 😊

                                         श्री भरत पाटील.

😊 प्रेरणादायी व्यक्तिमत्त्व : डॉ बाबासाहेब आंबेडकर😊

 💐 भारतीय राज्यघटनेचे शिल्पकार , महामानव, बोधिसत्व, भारतरत्न डॉ. भीमराव रामजी आंबेडकर 💐

             मध्यप्रदेश राज्यातील इंदौर मधील महू येथे त्याचा जन्म14 एप्रिल 1881मध्ये झाला.वडील रामजी तर आई आईचे नाव भीमाबाई.त्याचे मूळ गाव रत्नागिरी जिल्ह्यातील मंडणगड जवळील आंबडवे.त्याचे वडील रामजी हे महू येथील सैनिकी छावणीतुन निवृत्त झाल्यावर त्याचे प्राथमिक शिक्षण दापोली तर माध्यमिक शिक्षण सातारा,मुंबई येथे होते.पुढे तो मुलगा अचाट बुद्धिमतेच्या जोरावर त्या काळातील भारतातील सर्वात उच्चविद्याविभूषित मुलगा बनतो. समाजातील जातीय व्यवस्थेविरुद्ध बंड पुकारतो.लाखोंची गर्दी त्याच्या बौद्ध धर्म स्विकारण्याच्या निर्णयाला साथ देते.पुढे तो मुलगा स्वतंत्र भारताच्या  राज्यघटनेचा शिल्पकार बनतो .हे महान कार्य करणारा तो मुलगा म्हणजे भारतरत्न डॉ.भीमराव रामजी  आंबेडकर.       

               डॉ.आंबेडकरांचा भारत देशाच्या जडणघडणीत असणाऱ्या योगदानाबद्दल त्यांचा मरोणोत्तर भारतरत्न हा पुरस्कार देऊन सन्मान केला गेला.कार्ल मार्क्स सोबत चित्र लंडनच्या संग्रहालयात चित्र असणारी एकमेव व्यक्ती   म्हणजे डॉ.बाबासाहेब आंबेडकर. दिवसातून 18 तसा अभ्यास करणाऱ्या बाबासाहेबांनी पी.एच.डी अर्थशास्त्र,डी.एस.सी,एल.एल.डी,डी.लिट,बार.अँट.लॉ,यारख्या 32 पेक्षा अधिक पदव्या मिळवल्या.स्वतंत्र भारताचे पहिले कायदामंत्री,मसुदा समितीचे अध्यक्ष असणाऱ्या बाबासाहेबांनी सामाजिक,राजकीय,धार्मिक,शैक्षणिक, आर्थिक,सांस्कृतिक, ऐतिहासिक या साऱ्या क्षेत्रात आपले वेगळेपण सिद्ध केले.स्वतंत्र कामगार पक्ष,भारतीय बौद्ध महासभा,बहिष्कृत हितकारणी सभा यांच्या माध्यमातून सामाजिक व मागासवर्गीय समाजातील निराशा दूर करणारा महामानव म्हणजे डॉ. बाबासाहेब.नागरिकांचे मूलभूत अधिकार,मुळातून अस्पृश्यता दूर करणे,महिलांना मातृत्व रजा,महिला सबलीकरण, महिला बालकल्याण,महिलांना कामाच्या ठिकाणी संरक्षण मिळण्याचा कायदा हे सारे श्रेय बाबासाहेबांचे.   

            दलितांच्या हक्कांसाठी काळाराम मंदिर प्रवेश,महाड चवदार तळे सत्याग्रह, दलितांसाठी वेगळा मतदारसंघ,या घटना त्यांच्या कार्याची महती सांगतात.त्यांची जयंती ज्ञान दिन,त्यांच्या शाळेतील प्रवेशाचा 7 नोव्हेंबर दिन विद्यार्थी दिन,1 जानेवारी भारतीय संविधान दिन म्हणून साजरा केला जातो.प्रत्येक माणसाला इतिहासाचा भार हा वाहवाच लागतो.कारण तुम्ही आम्ही इतिहाच्या खांद्यावर उभे असतो.समाजीकतेचे चटके अनेक जणांनी अनुभवलेले असतात पण या चटक्यांची वस्तुनिष्ठ जाणीव करून देणारे थोडेच लोक असतात यात डॉ.बाबासाहेब आंबेडकर सर्वोच्च स्थानी आहेत.दादर मधील चैत्यभूमी येथील समाधी स्थळावर नतमस्तक होताना बाबासाहेब जणू हेच सांगत रहातात तुम्ही कोणत्या परिस्थिती जन्माला यावे हे तुमच्या हातात नाही ,पण असलेली परिस्थिती प्रंचड संघर्ष करून,समाजाचा विरोध पत्करून बदलणे मात्र तुमच्या हातात आहे.

💐💐💐💐💐💐💐💐💐💐💐💐💐

                                     😊 संकलन 😊

                                       श्री भरत पाटील.

😊 प्रेरणादायी व्यक्तिमत्त्व : सुधा मुर्ती 😊

 💐 दातृत्त्वाचा झरा, महान लेखिका : सुधा नारायण मुर्ती 💐         

            कर्नाटक राज्यातील शिगगाव येथे तिचा जन्म 19 ऑगस्ट 1950मध्ये झाला.वडील रामचंद्र व आई विमल यांची ती लाडाची मुलगी होती.लहानपणापासूनच ती तल्लख बुद्धिमत्तेची व तितकीच चंचल होती.तिची शिक्षणातील गती इतकी होती की 60 च्या दशकात ती सुवर्ण पदक मिळवून इंजिनिअर झाली.या काळात येथे फक्त पुरुषांची मक्ततेदारी होती.पुढे ती संगणक शास्रात एम.ई तर कॉम्प्युटर सायन्स मध्ये एम. टेक करते.टाटा कंपनीच्या स्थापनेपासून कंपनीत काम करणारी पहिली महिला इंजिनिअर ती बनते.पुढे जगातील बलाढ्य  संगणक कंपनी 'इन्फोसिस 'ची ती करोडो रुपयांची  भाग धारक बनते.अफाट समाज कार्य ती करते.हे सारे आगळे वेगळे काम करणारी ती मुलगी म्हणजे सुधा नारायण मूर्ती.    

               सुधा मूर्ती यांनी केलेल्या सामाजिक कामाबद्दल भारत सरकारचा पदमश्री,ओजस्विनी,आर.के.नारायण,राजलक्ष्मी,भारत अस्मिता,बेस्ट टिचर अवार्ड यासारखे अनेक पुरस्कार त्यांना मिळाले.सत्यभामा विद्यापीठाने त्यांचा डॉक्टरेट देऊन सन्मान केला आहे.त्या अध्यक्ष असलेल्या इन्फोसिस फाउंडेशन च्या माध्यमातून त्यांनी खुप मोठे काम उभे केले.यात कर्नाटक राज्यातील सर्व शाळांना संगणक व ग्रंथालये,दहा हजार पेक्षा अधिक शौचालयांचे बांधकाम,आपत्तीत नुकसान झालेल्या लोकांना 2500 हजार पेक्षा अधिक घरे त्यांनी बांधून दिली आहे.आपत्तीग्रस्तांना 250 कोटी पेक्षा अधिकची मदत करताना आरोग्य, शिक्षण, महिला सबलीकरण, स्वच्छता, आर्ट कल्चर यावर त्यांनी अभूतपूर्व काम केले.                 

            लेखिका म्हणून त्यांची डॉलर बहु, अस्तित्व,गोष्टी माणसांच्या, स्वर्गाच्या वाटेवर,सामन्यातील असामान्य,थैलीभर गोष्टी ,परीघ,ही पुस्तके प्रचंड गाजली.यातून येणारे उत्पन्न ही त्या समाज कार्यासाठी वापरतात.एक वेळ अशी होती की नारायण मूर्ती आणि सुधा ताई यांना दोन कॉफी मागवून पिणे सुद्धा परवडत नसे.कर्ज काढून सुरू केलेल्या इन्फोसिस  कंपनीच्या भागधारक त्याच सुधा ताईंची संपत्ती काही हजार कोटीच्या घरात आहे.इतक्या श्रीमंत असूनही ना काही दाखवण्याची हौस,ना श्रीमंतीचा डामडौल, मोठेपणाचा भपका नाही.त्या आपल्या लेखनात म्हणतात अंधारात बसण्यापेक्षा एक दिवा कधीही लावलेला बरा.यातून त्यांचे आयुष्य आपल्याला हेच शिकवण देते की तुमच्या कडे असणारे सर्वच तुमचे नाही जे जे तुमच्याजवळ अधिकचे आहे त्यावर ज्यांच्याकडे ते नाही त्यांचा वाटा आहे.तुम्ही त्यातून मदत करत चला त्याचे पुण्य आयुष्यातील कुठल्या ना कुठल्या वळणावर कामी येणार हे नक्की.

💐💐💐💐💐💐💐💐💐💐💐💐💐

                                       😊 संकलन 😊

                                      श्री भरत पाटील.

😊 प्रेरणादायी व्यक्तिमत्त्व : साने गुरुजी 😊

 💐 मातृपूजक, मातृहृदयी, स्वातंत्र्य सैनिक ,लेखक ,कवी व आदर्श शिक्षक : पांडुरंग सदाशिव साने 💐

            नवरत्नांची खाण असणाऱ्या रत्नागिरी जिल्ह्यात दापोली तालुक्यातील पालगड येथे त्याचा जन्म 24 डिसेंबर 1899 मध्ये झाला.वडील सदाशिव तर आई यशोदा. त्याचे घर खोतांचे पण नुसते नावाला मोठे होते.घरी असणाऱ्या गरिबीमुळे त्याच्या वडिलांवर कर्ज होते याच कारणामुळे त्याच्या घरावर जप्ती येते.कधी पुणे कधी दापोली,तर  कधी औंध अशी सारी शिक्षणाची परवड होते.तरीही तो इंग्रजी भाषेत एम.ए उत्तीर्ण होतो.काही दिवस अमळनेर येथे शिक्षक म्हणून नोकरीही करतो,पण प्रचंड देशप्रेमामुळे तो नोकरी सोडून भारतीय स्वातंत्र्य संग्रामात  उडी घेतो.त्याच्या कविता ,भाषणे हजारो लोकांच्या नसानसांत देशप्रेम जागृत करतात.मनाने अत्यंत मृदू असणारा हा मुलगा इंग्रजाशी लढताना वज्राहूनही कठोर होतो.प्रचंड देशप्रेमी, संवेदनशील, लहान मुलांचे प्रचंड वेड असणारा तो मुलगा म्हणजे पांडुरंग सदाशिव साने ऊर्फ साने गुरुजी.                     

            लहान मुलांची प्रचंड आवड असणाऱ्या गुरुजींनी'करील मनोरंजन जो मुलांचे जडेल नाते प्रभुशी तयाचे' हे लेखन त्याच आत्मीयतेतून केले.विद्यार्थी मासिक सुरू करताना राष्ट्र सेवा दलाची स्थापना केली.पंढरपूरच्या  मंदिरात वंचितांना प्रवेश मिळावा म्हणून उपोषण करणारे गुरुजी शेतकऱ्यांना करमाफी व्हावी म्हणून प्रसंगी आक्रमक झाले.इंग्रज सरकारने त्यांचा धसका घेवून 'बलसागर भारत होवो विश्वात शोभूनी राहो'या गीताच्या प्रती जप्त केल्या होत्या . .नाशिक येथे कारागृहात असताना त्यांनी मातृ प्रेमाने ओतप्रोत भरलेले आणि डोळ्याच्या कडा ओल्या करणारे 'श्यामची आई'हे घराघरात पारायण करण्यायोग्य पुस्तक लिहले.धुळे येथील तुरुंगात विनोबा भावेंची गीताई लिहीणाऱ्या गुरुजींनी 'साधना' साप्ताहिकातून अखंड सदभावनेचा प्रचार केला.               

           कथा,कादंबऱ्या,लेख निबंध, चरित्रे,कविता यावर 73 पेक्षा अधिक पुस्तके त्यांनी लिहीली.त्यांनी लिहीलेल्या श्यामची आई,आणि मोलकरीण या पुस्तकावर आलेले चित्रपट प्रचंड गाजले.रायगड मधील वडघर मुद्रे येथील 36 एकरातील व पुणे येथील दांडेकर पुलाजवळील दत्तवाडी येथील गुरुजींचे स्मारक त्यांच्या महान कार्याची साक्ष देते.खरा तो एकची धर्म जगाला प्रेम अर्पावे हे अवघ्या विश्वाला सांगणाऱ्या गुरुजींनी आपले जीवन मात्र आत्महत्या करून संपवले ही घटना शेवटपर्यंत अश्वत्थामाच्या भाळावरील भळभळती जखम बनून राहिली.संस्काराचे पवित्र रोपटे असणाऱ्या गुरुजींना प्र के अत्रे यांनी 'मृत्यूचे चुंबन घेणारा महाकवी उगाचच म्हणले नाही'.आयुष्याभर साधे जीवन जगलेल्या गुरुजींचे आयुष्य समजून घेताना कायम हेच जाणवते की तुमच्या कर्तृत्वाचा सुगंध दशदिशात पसरतो तो तुमच्यातील चांगुलपणामुळे,नम्रतेने, विनयशीलतेने.हेच सगळे गुण तुम्हाला एकदम मोठे करत नसले तरी एक दिवस असा येतो त्या दिवशी तुम्ही इतरांपेक्षा उजवे ठरता.

💐💐💐💐💐💐💐💐💐💐💐💐💐

                                      😊 संकलन 😊

                                        श्री. भरत पाटील.

😊 प्रेरणादायी व्यक्तिमत्त्व : डॉ ए पी जे अब्दुल कलाम 😊

 💐 महान भारतीय वैज्ञानिक, भारतरत्न डॉ ए पी जे अब्दुल कलाम 💐

             तामिळनाडू राज्यातील रामेश्वरम येथील धनुषकोडी येथे त्याचा जन्म 15 ऑक्टोबर 1931 मध्ये झाला.त्याच्या घरातील परिस्थिती अत्यंत गरिबीची होती.वडील जैनूलाब्दिन आणि आई आशिमा इतक्या कठीण परिस्थितीतही होडी चालवण्याचा व्यवसायातून संसाराचा गाडा रेटत होते.इतक्या संकटमय स्थितीत तो मुलगा मात्र खचला नाही.परिस्थितीला तो जणू हे सांगत राहिला मी आता ऐरणीवर असलो तरी  मी एक दिवस हातोडा होऊन नक्की घाव घालणार. महाविद्यालयात शिकण्याइतके पैसेही त्याच्याकडे नसतात.बहिणीचे दागिने गहाण ठेवून,पेपर टाकून तो मुलगा एरोनॉटिकल इंजिनिअरिंग चे शिक्षण पूर्ण करतो.पुढे अवकाश संशोधनाचा डिप्लोमाही पूर्ण करतो.नंतर संरक्षण संशोधन व विकास संस्थेशी(DRDO) त्याचा संबंध येतो.येथे भारतीय अवकाश संशोधन संस्थेत अर्थात इस्त्रो मध्ये तो मुलगा आपल्या अत्युच्च बुद्धीमत्तेच्या जोरावर  भारत देशाचा जगात दबदबा वाढेल अशी अनेक क्षेपणास्त्र निर्मिती करतो.हे देशगौरवाचे काम करणारा तो मुलगा म्हणजे जगप्रसिद्ध शास्त्रज्ञ अवूल पाकिर जैनुलाब्दिन अब्दुल कलाम.      

           बालपण अत्यंत परिश्रमात व्यतित करून अखंड ज्ञानाची साधना करणाऱ्या डॉक्टर कलाम यांना भारतरत्न,पद्मविभूषण,पदमश्री,इंदिरा गांधी राष्ट्रीय एकात्मता,रामानुजन,यासारखे अनेक मानाचे पुरस्कार मिळाले.किंग चार्ल्स दुसरा पदक,हुवर पदक देऊन त्यांचा जागतिक दर्जाचे शास्त्रज्ञ म्हणून गौरव केला गेला.यु के,सिंगापूर, अण्णा युनिव्हर्सिटी यांनी त्यांचा डॉक्टरेट देऊन सन्मान केला. स्वतंत्र भारताचे 11 वे राष्ट्रपती झाले हा मान प्रथमच एका शास्त्रज्ञ व्यक्तीला मिळाला होता. 

          देशाच्यासुरक्षितेच्या दृष्टीने त्यांनी अनेक मोहीम यशस्वीकेल्या.अर्जुन रणगाडा,लाईट कॉबॉट एअर क्राफ्ट,त्रिशूल व पृथ्वी हेअग्निबाण आकाश,नाग,अग्नी व ब्रह्मोस प्रक्षेपण अस्त्रे,या सर्व निर्मितीत त्यांचा वाटा मोलाचा होता.राजस्थान मधील पोखरणची अणुचाचणी यशस्वी करताना त्यांनी देश अण्वस्त्र अणुशक्ती संपन्न बनवला.      

               इंडिया माय ड्रीम,टर्निंग पॉईंट, टार्गेट मिलेनियन, साइंटिस्ट टू प्रेसिडेंट यासांरखी त्यांची अनेक पुस्तके गाजली.मराठी भाषेत अग्निपंख हे त्यांच्या जीवनावरील पुस्तक प्रचंड लोकप्रिय झाले.पुढिल वीस वर्षांचे आधुनिक भारताचे स्वप्न पाहणाऱ्या या माणसाचे अनेक युवक युवती प्रचंड चाहते होते.इतक्या बुद्धिमान माणसाचा व्याख्यान देता देता शेवट होणे यासारखे परमभाग्य ते काय असणार.डॉक्टर कलाम यांचे आयुष्य कष्टमय  होते पण ते लढले आणि जिंकलेही.त्यांचे जीवन आपल्यालाही सतत हेच सांगत राहते की येणाऱ्या आव्हानांना भिडायची तयारी असेल तर समोरचा प्रसंग कितीही बाका असेल तरी तुम्हाला प्रचंड,दुर्दम्य आत्मविश्वासाच्या जोरावर कठीण आयुष्याची लढाई जिंकता येते.

💐💐💐💐💐💐💐💐💐💐💐💐💐

                                      😊 संकलन 😊

                                      श्री भरत पाटील.

😊 प्रेरणादायी व्यक्तिमत्त्व : अटलबिहारी वाजपेयी 😊

 💐 भारताचे माजी पंतप्रधान, महान कवी : भारतरत्न अटलबिहारी वाजपेयी 💐

            जुन्या ग्वाल्हेर संस्थानातील म्हणजेच आताच्या मध्यप्रदेश राज्यात त्याचा जन्म ग्वाल्हेर येथे 25 डिसेंबर 1924 मध्ये झाला.वडील कृष्णबिहारी हे प्रसिद्ध कवी आणि प्राथमिक शिक्षक तर आई कृष्णादेवी गृहिणी. लहानपणी कवितेचा व साहित्याचा वारसा त्याला घरातच मिळाला होता.कानपूर विदयापीठातून तो राज्यशास्त्राची पदवी मिळवतो.पुढे भारत छोडो चळवळीत तुरुंगातही जातो.पत्रकार म्हणूनही तो काही  काळ काम करतो.त्याच्या कविता रसिकांना मोहिनी घालू लागतात.आपल्या अमोघ वक्तृत्वाच्या जोरावर तो मुलगा राजकारणात स्वतःचा वेगळा ठसा उमटवतो. सुसंस्कृत राजकारणाचा वेगळा वस्तुपाठ घालून देताना तो भारतासारख्या जगातील सर्वात मोठ्या लोकशाही देशाचा तीन वेळा पंतप्रधान होतो.तो कसलेला संसदपटू,कवी मनाचा राष्ट्रनेता,अजातशत्रू नेता बनतो. हे सगळे यश मिळवणारा,लोकतंत्राच्या भाळावर यशाची कहाणी स्वतः लिहीणारा तो मुलगा म्हणजे भारतरत्न अटल बिहारी वाजपेयी.            

             वाजपेयी यांना भारतरत्न, पदमविभूषण,लोकमान्य टिळक, डी .लिट यासारखे सन्मान मिळाले.चार दशके सक्रिय राजकारणात वावरताना नऊ वेळा लोकसभेवर,तर दोन वेळा राज्यसभेवर ते निवडून गेले.आपल्या अमोघ वक्तृत्वाने ते सारी संसद मंत्रमुग्ध करत असत .यामुळेच सत्ताधारी आणि विरोधकही त्यांचे चाहते ,मित्र होते.ते पंतप्रधान असताना पोखरण येथील धाडसी अणूचाचणी,कारगील युद्ध,कावेरी जल विवाद,दिल्ली लाहोर सुरू झालेली  बससेवा, या सर्व निर्णयात त्यांच्या कणखरतेची,राष्ट्रप्रेमाची,चुणूक दिसून आली.जय जवान,जय किसान,जय विज्ञान ही त्यांची घोषणा भारतीय विज्ञान संशोधनाला प्रेरणा देणारी होती.  

          अमर आग हैं, अमर बलिदान,मृत्यू या हत्या हे त्यांचे लेखन लोकप्रिय झाले. तर एक बरस बीत गया,झुक नही सकते,कदम मिलाकर चलना होगा, कौरव कौन पांडव कौन,या  कविता प्रचंड लोकप्रिय झाल्या.त्यांचा जन्मदिवस 'सुशासन दिवस'म्हणून साजरा  केला जातो.माझ्या कवितांमध्ये भीतीचा आवाज नव्हे तर जिंकण्याचा जयघोष असेल असे ते  सांगत असे,निगर्वी,शांत,कमालीचा संयम,कुणाशीही कायमचे शत्रुत्व नाही हे सारे त्यांचे गुण आपल्या आयुष्यात घेण्यासारखे.आयुष्यभर अविवाहित असणारे वाजपेयी भारतीय राजकारणातील एक नेता नाहीत तर ते भारताचे असे रत्न आहेत ज्यांच्या अवतीभोवती सुसंस्कृत राजकारणाचा पूर्ण सारीपाट चालत राहतो.

💐💐💐💐💐💐💐💐💐💐💐💐💐

                                😊 संकलन 😊

                               श्री. भरत पाटील.

😊 प्रेरणादायी व्यक्तिमत्त्व : प्रल्हाद केशव अत्रे 😊

 💐 महान लेखक ,कवी,निर्माते,दिग्दर्शक : प्रल्हाद केशव अत्रे .💐

       

            पुणे जिल्ह्यातील पुरंदर तालुक्यामध्ये कोडीत खुर्द येथे त्याचा जन्म 13 ऑगस्ट 1898 मध्ये झाला.आई अन्नपूर्णा तर वडील केशवराव यांच्या पोटी जणू रत्नच जन्माला आले होते.सुरवातीला काही दिवस गावात राहून नंतर तो पुणे शहरात येतो .पुणे नरजेत सामावून घेतो.येथे खुप काही जीवन जगणे शिकतो.त्याच्या अंगी असणाऱ्या वक्तृत्व कलेमुळे हजारोंची गर्दी जमू लागते.आपल्या विनोद बुद्धीने लोकांना तो पोट धरून हसायला शिकवतो. लेखक,कवी नाटककार,संपादक,पत्रकार,मराठी हिंदी चित्रपट निर्माता, शिक्षणतज्ज्ञ,, राजकारणी ,वक्ता अशा सगळ्या प्रांतात तो मुलगा आपले निर्विवाद वर्चस्व प्रस्थापित करतो.त्याच्या चित्रपटाला पहिले राष्ट्रिय सुवर्णकमळ मिळते.या साऱ्या प्रांतात आश्चर्यकारक यश मिळवणारा तो मुलगा म्हणजे  'प्रल्हाद केशव अत्रे.'                  

           आचार्य अत्रे यांना 'विष्णुदास भावे 'हा मानाचा पुरस्कार मिळाला आहे.अत्रे यांच्या नावाने अनेक सांस्कृतिक भवने,नाट्यगृहे,सांस्कृतिक मंडळे, स्मारके तयार झाली.वरळी येथे त्यांचा 34 फुटी पुतळा त्यांच्या कार्याची आठवण रहावी म्हणून उभारला आहे.'अत्रे अत्रे सर्वत्र' 'मी अत्रे बोलतोय'हे कार्यकम आजही तिकीट लावून पाहिले जातात.त्यांनी दिग्दर्शन केलेल्या 'श्यामची आई' चित्रपटाला पहिले राष्ट्रीय 'सुवर्णकमळ'मिळाले.२२पेक्षा अधिक नाटके त्यांनी लिहताना 'कऱ्हेचे पाणी' हे प्रचंड गाजलेले आत्मचरित्र लिहले.'झेंडूची फुले' वाचताना लोक पोट धरून हसले.तो मी नव्हेच,मोरूची मावशी,पराचा कावळा,ही नाटके,तर कावळ्यांची शाळा,कशी आहे गंमत,यासारख्या कथा त्यांनी लिहल्या.रत्नाकर,मनोरमा, इलाखा शिक्षक,ही मासिके,नवयुग साप्ताहिक, आणि मराठा दैनिक त्यांनी सुरू केले.                                     

          अत्रे यांच्या घणाघाती भाषणांचा संयुक्त महाराष्ट्र मिळण्यात मोठा  वाटा आहे. भांबुर्डे गावाचं शिवाजीनगर आणि रे मार्केटचे महात्मा फुले मार्केट असे नामकरण करण्यात त्यांचा पुढाकार होता. साहित्य संमेलनाचे अध्यक्ष राहिलेल्या अत्रेंच्या नावाने सासवड येथे   दरवर्षी साहित्य संमेलन भरवले जाते.तेथे अत्यंत मानाचा 'आचार्य अत्रे' पुरस्कार निवडलेल्या व्यक्तीला प्रदान करण्यात येतो.18 वर्षे शिक्षक म्हणून काम करणाऱ्या अत्रे यांच्या भाषणांचा जनसामान्यावर प्रचंड पगडा होता.अत्रे आयुष्याबद्दल सांगताना म्हणतात जीवनातील सर्व दुःखे समूळ नाहीशी करणे आपल्या हातात नसते.पण त्या दुःखाना हसण्यावारी घेणे किंवा हसून घालवणे ,जीवनातील आशा, आनंद शाबूत ठेवणे हे मात्र आपल्या हातात नक्कीचअसते.

💐💐💐💐💐💐💐💐💐💐💐💐💐

                                  😊 संकलन 😊

                                   श्री. भरत पाटील.

😊 प्रेरणादायी व्यक्तिमत्त्व : ताराबाई मोडक 😊

 💐 पहिल्या भारतीय बालशिक्षणतज्ञ : ताराबाई मोडक 💐

               तिचा जन्म 19 एप्रिल 1892 मध्ये इंदूर येथे झाला.वडील सदाशिव केळकर तर आई उमाबाई.तिच्या वडिलांनी  ठरवून त्या काळात विधवा असणाऱ्या उमाबाईशी विवाह केला.त्यांच्या पोटी ही जन्माला आली.विधवा आईची मुलगी म्हणून तिच्या वाट्याला शाळेपासून हेटाळणी आली. पण ती तेथेही खंबीर राहिली.पुण्याच्या हुरूरपागेत जीवनाच्या अनेक गोष्टी शिकली.प्रार्थना समाजामुळे प्रगत विचार तिच्या अंगी भिनत गेले.यातून ती भावनगर येथे गिजुभाई बधेका या प्रसिद्ध शिक्षणतज्ज्ञ माणसाच्या संपर्कात येते.मग ती मागे वळून पहात नाही.ज्या काळात शिक्षण दुर्मिळ असते त्यास काळात ती बालशिक्षण चा मुद्दा मांडते.मुले लहान पणापासूनच शिकत असतात हे सांगताना ठाणे येथील कोसबाड ला हे सिद्ध करून दाखवते.पुढे हीच बालशिक्षण शिक्षण पद्धती साऱ्या देशात स्वीकारली जाते.हे काम करणारी ती मुलगी म्हणजे भारतातील पहिल्या बालशिक्षणतज्ञ ताराबाई मोडक.

           ताराबाई यांनी बालशिक्षणावर केलेले काम भारत सरकारच्या नजरेतून सुटले नाही.या कार्याचा गौरव म्हणून त्यांना1962 साली पदमभूषण पुरस्कार प्रदान करण्यात आला.ताराबाई यांनी विधानसभा सदस्य, पाठयपुस्तक समिती सदस्य, अखिल भारतीय बालशिक्षण विभाग अध्यक्ष,केंद्र राज्य सरकार बालशिक्षण समिती सदस्य यासारखी महत्त्वाची पदे भूषवली.महात्मा गांधी यांनी बुनियादी शिक्षण पद्धतीचा आराखडा बनवण्याचे काम त्यांना दिले होते.

            त्यांनी कोसबाडला सुरू केलेल्या कुरणशाळा, घंटाशाळा,अंगणवाडी,गीता शिक्षण पद्धती,ग्रामीण बालवाडी,ग्रामबाल अध्यापन मंदिर या संकल्पना देशभर स्वीकारल्या गेल्या.1936 साली दादरला पाहिले शिशुविहार सुरू करणाऱ्या ताराबाईंना जसे गुरू म्हणून गिजुभाई बधेका मिळाले तशा अनुताई वाघ यांना ताराबाई गुरू मिळाल्या.कोसबाडला 28 वर्षे शिक्षणावर काम करणाऱ्या ताराबाईंनी बालशिक्षणाला वेगळी दिशा देताना लहान मुलांच्या शिक्षणात त्या काळी संगीत,नृत्य, कला,लोकगीते,अभिजात संगीत,यांचा समावेश केला.नदीची गोष्ट, बालकाचा हट्ट ,बालविकास व शिस्त,बिचारी बालके ही त्यांची पुस्तके खुप लोकप्रिय झाली. ताराबाई यांनी हे काम करताना पावोलीपावली भिडणारी कठीण परिस्थितीत संकट म्हणून न स्वीकारता संधी म्हणून स्वीकारली.यातून निव्वळ मार्गच काढला नाही तर सुंदर संकल्पना घडवल्या.वैयक्तिक आयुष्यातील होरपळीचे प्रतिबिंब कधीच त्यांच्या ना स्वभावात आले ना त्यांच्या व्यक्तिमत्त्वात.

💐💐💐💐💐💐💐💐💐💐💐💐💐

                                  😊 संकलन 😊

                                    श्री. भरत पाटील.

😊 प्रेरणादायी व्यक्तिमत्त्व : टॉमस बाटा 😊

 💐 बाटा चे संस्थापक : टॉमस बाटा 💐

         झेकोस्लाव्हिया येथील झेलीन या छोट्या खेड्यात त्याचा जन्म होतो.वडील जोडे बनवायचे काम करत असतात. तोही याच व्यवसायात प्रगती करायचे ठरवतो.मग तो मुलगा त्याचा भाऊ आणि बहीण  एकत्र येऊन वडिलोपार्जित स्वतःचा जोडे बनवण्याचा व्यवसाय कंपनीच्या रुपात 1894 मध्ये सुरू करतात.हे फार मोठे धाडसी पाऊल असते.सुरवातीला कंपनीत 10 कामगारांची भरती होते.लेदरचे जोडे बनवण्यासाठी खुप खर्च येत असल्यामुळे कंपनी स्थापन झाल्यावर दुसऱ्याच वर्षी कंपनीला प्रचंड तोटा सहन करावा लागतो.यावर उपाय म्हणून तो मुलगा लेदर ऐवजी कॅनव्हास चे जोडे बनवायला सुरुवात करतो.कमी किंमत आणि वजनाने हलके बूट इतके लोकप्रिय होतात की कंपनीला करोडो रुपये नफा होतो.मग मात्र तो मागे वळून पहात नाही. पुढे त्या कंपनीच्या जगातील 90 देशात 5200 च्या वर शाखा आणि 30 हजार पेक्षा अधिक कर्मचारी होतात. ती यशस्वी कंपनी म्हणजे 'बाटा'आणि इतके मोठे यश मिळवणारा त्या कंपनीचा मालक तो मुलगा म्हणजे 'टॉमस बाटा'.                              

          बाटा यांनी विदेशात जाऊन एका वेळी अनेक बूट कसे बनवले जातात याचे प्रशिक्षण घेऊन ते मायदेशात आले.तेथे आल्यावर त्यांनी BATOVKY नावाचा वजनाने अतिशय हलका,दिसायला सुंदर,कमी किंमतीचा बूट बनवला.हा बूट नोकरदार वर्गात तुफान लोकप्रिय झाला.याची मागणी इतकी होती की कंपनीला त्याचा पुरवठा करण्यासाठी नवीन कामगारांची भरती करावी लागली.पहिल्या महायुद्धात सैन्यासाठी मजबूत असे बूट बाटा कंपनीने अनेक देशांना बनवून दिले.यावेळी कंपनीचा काळ उत्कर्षाचा काळ होता.                                          

          पहिले महायुद्ध संपले आणि आर्थिक मंदी चालू झाली.कंपनीचे मोठे उत्पादन पडून होते खप नव्हता.पण बाटा येथेही खचले नाही.त्यांनी एक धाडसीनिर्णय घेतला जो याअगोदर कुणीही घेतला नव्हता.त्यांनी बाटा कंपनीची सर्व पादत्राणे 50 टक्के सवलतीत देण्याची घोषणा केली.हीही कल्पना तुफान लोकप्रिय झाली.ज्यावेळी मंदीत अनेक कंपन्या बंद पडल्या त्यावेळी बाटा कंपनीला हजारो बूट बनवण्याच्या ऑर्डर येत होत्या.रसायन,टायर,रबर,चामडे यात बाटा आजही आघाडीवर आहे.स्वस्त, चांगला दर्जा,आकर्षक डिझाईन हीच बाटा च्या उत्पादनाची वैशिष्ट्ये आजही टिकून आहे.खुप काळ लोटला असला तरी आजही पायात घालायच्या बाटा कंपनीची पादत्राणे अनेकांच्या मनावर अधिराज्य गाजवत आहे.सरासरी 10 लाख लोक बाटा ची उत्पादने जगात खरेदी करतात.कंपनीचे मुख्यालय स्वित्झर्लंड येथे आहे.बाटा यांना अनेक अडचणी आल्या पण ते मागे हटले नाही.पुन्हा नव्याने सुरुवात केली.आपल्या जीवनात अनेक संकटे येतात ती आपल्याला मोठे करण्यासाठीच असतात. कारण आपण त्यातून कसा मार्ग काढतो यावर आपल्या संयमाची परीक्षा ठरत असते.

💐💐💐💐💐💐💐💐💐💐💐💐💐

                                  😊 संकलन 😊

                                 श्री भरत पाटील.

😊 प्रेरणादायी व्यक्तिमत्त्व : गुरुदेव रवींद्रनाथ टागोर 😊

 💐 भारतीय राष्ट्रगीतकार : गुरुदेव रवींद्रनाथ टागोर 💐   

          पश्चिम बंगाल राज्यातील कोलकाता येथील जोराशंका ठाकूरवाडी येथे त्याचा जन्म 7 मे 1861 मध्ये झाला.वडील देवेंद्रनाथ व आई सरला यांना एकूण 14 अपत्ये झाली. यातील तो तेरावे अपत्य होता.लहानपणापासून त्याला कवितेचा छंद लागला. वयाच्या 8 व्या वर्षी त्याने पहिली कविता लिहीली.पुढे भानूसिंह टोपणनावाने तो लेखन करू लागला.वडिलांबरोबर भारतभ्रमण करताना त्याने अनेक महान व्यक्तीची आत्मचरित्रे वाचली.इतिहास,खगोलविज्ञान, संस्कृत असा चौफर अभ्यास केला.यातून तो इतका प्रगल्भ लेखक झाला की त्याने लिहिलेली *गीते दोन देशाची राष्ट्रगीते म्हणून स्वीकारली जातात.त्याच्या साहित्याला नोबेल पारितोषिक मिळते.तो महान कवी म्हणजे रवींद्रनाथ टागोर ऊर्फ गुरूदेव*           

          गुरुदेव यांनी लिहिलेले 'जण गण मन'हे भारताचे तर 'आमार शोनार' हे बांग्लादेश चे राष्ट्रगीत आहे.दोन राष्ट्रगीतांचे जनकत्व असणारे पृथ्वी वरील एकमेव कवी म्हणजे गुरुदेव.त्यांच्या गीतांजली या साहित्य कृतीला आशिया खंडातील व भारतातील पाहिले *नोबेल* पारितोषिक मिळाले.चित्रकार, नाटककार, कादंबरीकार,कवी,संगीतकार अशा सर्व जागी त्यांनी आपले वेगळेपण सिद्ध केले.चतुरंग,मुक्तधारा,राजा और राणी,चार अध्याय,कबुलीवाला या त्यांच्या काही गाजलेल्या साहित्य कृती.विस्तृत व उच्च दर्जाची साहित्य कृती यासाठी रवींद्रनाथ प्रसिद्ध होते.                    

          त्यांनी घोकमपट्टीच्या शिक्षणाला पर्याय म्हणून शांतिनिकेतन उभे करताना शील शाळा,बागबगीचा,ग्रंथालय यांची स्थापना केली.संत तुकाराम महाराजांचे साहित्य बंगाली भाषेत जसे त्यांनी अनुवादित केले तसे छत्रपती शिवाजी महाराजांच्या जीवनावर खंडकाव्य ही लिहले.कथा,कादंबऱ्या,लघुकथा,प्रवासवर्णने, नाटके  हे सारे साहित्य प्रकार त्यांनी हाताळले. जालियनवाला बाग हत्याकांडा नंतर त्याचा निषेध म्हणून इंग्रज सरकारला'सर' ही पदवी परत केली.कायम निसर्गाच्या सानिध्यात रमणारे गुरुदेव यांच्या जीवनाकडे पाहताना हेच जाणवते की तुम्हाला ज्या गोष्टींत आवड आहे तेच काम करा.आवडीच्या कामात तुम्ही अधिकचे प्रयत्न करून अधिक यशस्वी होता.

💐💐💐💐💐💐💐💐💐💐💐💐💐

                              😊 संकलन 😊

                               श्री भरत पाटील.

😊 प्रेरणादायी व्यक्तिमत्त्व : सिंधुताई सकपाळ 😊

 💐😊 अनाथांची आई : सिंधुताई सकपाळ 😊

          वर्धा जिल्ह्यातील जंगल भागातील नवरगाव येथे तिचा जन्म 14 नोव्हेंबर 1947 मध्ये अत्यंत गरीब कुटुंबात झाला.वडील अभिमान साठे हे गुरे राखायचे काम करत असे.घरात अजिबात शैक्षणिक वातावरण नाही.तरीही ती चौथी पर्यत शाळा शिकते.ती नऊ वर्षांची असताना तिच्या पेक्षा वयाने 26 वर्षे मोठ्या असणाऱ्या श्रीहरी बरोबर तिचे लग्न लावून दिले जाते.सासरी प्रचंड सासुरवास सुरू होतो.शेण काढणाऱ्या महिलांना मजुरी मिळत नाही म्हणून ती  आवाज उठवते.यामुळे जमीनदार दुखावले जातात.तिच्या पोटातील मूल तिचे नाही अशी आवई उठवली जाते.नवराही तिच्यावर संशय घेतो.तिला मारहाण करून घराबाहेर काढतो.रेल्वे स्टेशन वर भीक मागून ती जीवन जगते. इतक्या भयाण,कठीण प्रसंगातही ती जगणे सोडत नाही.पुढे ती हजारो अनाथ मुलांची आई होते. ती मुलगी म्हणजे अनाथांची आई सिंधुताई सपकाळ उर्फ माई.

           माई यांनी केलेल्या अथांग अशा सामाजिक कार्याबद्दल त्यांना पदमश्री,डॉ.बाबासाहेब आंबेडकर समाज भूषण,अहिल्याबाई होळकर, मूर्तिमंत आई,रिलायन्स फाउंडेशन चा रिअल हिरो,प्राचार्य शिवाजीराव भोसले,सहयाद्रीची हिरकणी, पुणे विद्यापीठाचा जीवन गौरव यासारखे असंख्य पुरस्कार मिळाले.डी.वाय पाटील विद्यापीठाने त्यांचा डॉक्टरेट देऊन सन्मान केला आहे.पुरंदर तालुक्यातील कुंभरवळण येथून 'ममता बाल सदनचा 'सुरू झालेला प्रवास 4 पेक्षा अधिक अनाथाश्रमापर्यंत आला.यात हजारो अनाथ  मुले शिकली ,नोकरीला लागली.माईंच्या जीवनावर आलेला 'मी सिंधुताई सपकाळ'हा चित्रपट,अनाथांची यशोदा हा अनुबोधपट तर 'मी वनवासी'हे आत्मचरित्र प्रचंड लोकप्रिय झाले.                         

         अनाथ मुलांचा सांभाळ करताना पोटच्या मुलीबद्दल माया उत्पन्न होऊ नये म्हणून श्रीमंत दगडू हलवाई गणपती ट्रस्ट ला आपली मुलगी ममता ला दत्तक  देणाऱ्या माई  हजारो मुलांच्या आई झाल्या.लहान मुलांना भोजन, कपडे,शिक्षण,या मूलभूत गरजा त्यांनी पुरवल्या.शिक्षणानंतर स्वतःच्या पायावर उभे राहण्यासाठी मदत व मार्गदर्शन केले.इतकेच नाही अनेक अनाथ मुले मुली यांचे विवाह ही करून दिले.इतके पुण्य क्वचित कुणाच्या वाट्याला येते.काही दिवस कचऱ्यातील अन्न खाऊन जगणाऱ्या माईंनी मात्र अनेक अनाथ बालकांचे हात कचरा वेचण्यापासून वाचवले आणि शिक्षित केले.माई बद्दल कितीही लिहले तरी शब्द अपुरे. माई यांचे आयुष्य आपल्याला हेच सांगते स्त्री ही सोशिक असतेच पण प्रसंगी दुर्गा होऊन ती संकटावर मातही करते.भयाण संकटात कधीही मागे न हटता जबाबदारी सह गगनभरारी घेण्याची ताकद जगात फक्त आणि फक्त स्त्री कडेच असते.

💐💐💐💐💐💐💐💐💐💐💐💐💐

                                  😊 संकलन 😊

                                  श्री भरत पाटील.

😊 प्रेरणादायी व्यक्तिमत्त्व : किरण बेदी 😊

 💐 😊 प्रेरणादायी व्यक्तिमत्त्व : किरण बेदी 😊

        तिचा जन्म पंजाब मधील अमृतसर येथे 9 जून 1949 मध्ये झाला.वडील प्रकाशलाल कापड व्यापारी तर आई प्रेमलता ही गृहिणी. हिच्या सह घरात तीन बहिणी.पण वडिलांनी मुलींना कायम मुलासारखे वाढवले. ती नऊ वर्षाची असल्यापासून टेनिस खेळायला लागली.पुढे टेनिस खेळात भारताचे दोन वेळा प्रतिनिधित्व केले.कॉलेज जीवनात तिचा आदर्श एन .सी.सी.विद्यार्थिनी म्हणून सन्मान झाला.पण तिच्यातील वेगळे काहीतरी करण्याची उर्मी तिला स्वस्थ बसू देत नव्हती.ती त्यासाठी प्रचंड मेहनत घेते राज्यशास्राची प्राध्यापक म्हणून काम करताना खुप अभ्यास करते. आणि ती मुलगी भारतातील पहिली महिला आय .पी .एस .अधिकारी बनते. हे यश मिळवणारी ती मुलगी म्हणजे किरण ब्रिज बेदी*              

कर्तव्य कठोर,करारी स्वभाव,कामाप्रती प्रचंड निष्ठा या साऱ्या गुणांमुळे त्यांना रॅमन मॅगसेसे अवार्ड,वुमन ऑफ द इयर,लायन्स क्लब ऑफ द इयर,मदर तेरेसा नॅशनल अवार्ड,पोलीस शौर्य पदक, युनायटेड नेशन मेडल,यासारखे अनेक सन्मान मिळाले.कर्तव्यम,विजयाशांती,     आय. पी .एस तेजस्विनी असे चित्रपट त्यांच्या जीवनावर प्रदर्शित झाले.संरक्षण दलात उपकमांडर,दिल्लीच्या आय जी,उपसंचालक यासारखी मोठी पदे त्यांनी भूषवली.तिहार कारागृहात त्यांनी कैद्याच्या जीवनात केलेल्या सुधारणा जगभर अंमलात आणल्या गेल्या.      

 *आय डिअर,ॲज आय सी,इट्स अल्व्हेज पॉसिबल यासारखी 20 हुन अधिक गाजलेली पुस्तके त्यांनी लिहिली . महिला सुधारणा ,पोलीस सुधारणा,तुरुंगातील सुधारणा,ग्रामीण विकास यावर काम करण्यासाठी त्यांनी नवज्योती व इंडिया फाउंडेशन ची स्थापना केली.मसुरी येथील राष्ट्रीय अकादमी मध्ये पोलीस ट्रेनिंग मध्ये 80 पुरुष तुकडीतील त्या एकमेव महिला होत्या.किरण बेदी यांनी स्वप्न पाहिले त्याचा पाठलाग केला.त्या स्वप्न जगल्या मगच यशस्वी झाल्या.आपण किरण बेदी यांच्या जीवनाकडे पाहताना हाच आदर्श घ्यायचा  की ज्यांना जीवनात यशस्वी व्हायचे आहे त्यांच्यासाठी पुरूष वा महिला हा भेद नसतो.यशस्वी होण्यासाठी हवी ती स्वप्नांचा पाठलाग करून त्यांना पूर्ण करण्याची जिद्द व क्षमता*

💐💐💐💐💐💐💐💐💐💐💐💐💐

                                😊 संकलन 😊

                                 श्री भरत पाटील.